Raleigh One : మార్కెట్లోకి సరికొత్త రేలీ వన్ ఎలక్ట్రిక్ బైక్.. ఒక్క ఛార్జ్‌తో 80 కిలోమీటర్ల రేంజ్

Raleigh One : ప్రముఖ సైకిళ్ల తయారీ బ్రాండ్ రేలీ సరికొత్త ఎలక్ట్రిక్ బైక్ రేలీ వన్‎ను అంతర్జాతీయ మార్కెట్లో విడుదల చేసింది. నగరాల్లో నివసించే వారి రోజువారీ అవసరాలను దృష్టిలో ఉంచుకుని ఈ మోడల్‌ను ప్రత్యేకంగా డిజైన్ చేశారు. ఇది స్టెప్-థ్రూ ఫ్రేమ్‌తో రావడం వల్ల పురుషులతో పాటు మహిళలు, వృద్ధులు కూడా దీనిని చాలా సులభంగా నడపవచ్చు. ఎంతో స్టైలిష్ లుక్‌తో కనిపించే ఈ ఈ-బైక్ సిటీ ట్రాఫిక్‌లో ప్రయాణించడానికి అత్యంత అనుకూలమైన వాహనంగా నిలుస్తుందని కంపెనీ పేర్కొంది.

రేలీ వన్ ఎలక్ట్రిక్ బైక్ ధర ఎంతంటే?
అంతర్జాతీయ మార్కెట్లో రేలీ వన్ ఎలక్ట్రిక్ బైక్ ధరను 2,399 యూరోలుగా నిర్ణయించారు. అంటే మన భారత కరెన్సీలో దీని విలువ సుమారు రూ.2,60,000 వరకు ఉంటుంది. ప్రస్తుతం ఈ స్మార్ట్ ఈ-బైక్‌ను కంపెనీ తన అధికారిక వెబ్‌సైట్‌లో లిస్ట్ చేసింది. వినియోగదారులను ఆకట్టుకోవడానికి దీనిని రెండు సరికొత్త రంగుల్లో అందుబాటులోకి తెచ్చారు. అందులో ఒకటి  ఆఫ్ వైట్ కాగా, మరొకటి టీల్ కలర్ ఆప్షన్. ఆసక్తి గల కస్టమర్లు నేరుగా వెబ్‌సైట్ ద్వారా దీనిని ఆర్డర్ చేసుకోవచ్చు.

దూకుడు పెంచే మోటార్, అదిరిపోయే రేంజ్
సాంకేతిక వివరాల విషయానికి వస్తే, రేలీ వన్ ఈ-బైక్‌లో 250 వాట్స్ శక్తివంతమైన  మివైస్ రియర్ హబ్ మోటార్‌ను అమర్చారు. ఇది గరిష్టంగా 35 ఎన్ఎమ్ టార్క్‌ను ఉత్పత్తి చేస్తుంది. ఈ ఎలక్ట్రిక్ బైక్ గరిష్ట వేగం గంటకు 25 కిలోమీటర్లుగా ఉంది. ఇందులో 360Wh సామర్థ్యం గల రిమూవబుల్ బ్యాటరీని ఇచ్చారు. ఈ బ్యాటరీని కారు లేదా బైక్ నుండి వేరు చేసి ఇంట్లోనే సులభంగా ఛార్జ్ చేసుకోవచ్చు. ఇది ఎకో మోడ్‌లో ప్రయాణిస్తే ఒకే ఛార్జ్‌పై గరిష్టంగా 80 కిలోమీటర్ల రేంజ్ ఇస్తుంది. అదే ఒకవేళ ఎక్కువ పవర్ కావాలనుకుంటే బూస్ మోడ్‌లో 50 కిలోమీటర్ల వరకు ప్రయాణించవచ్చు.

గ్రీస్ లేని ప్రయాణం.. స్మార్ట్ ఫీచర్లు ఎన్నో
ఈ బైక్‌లో ఉన్న మరో పెద్ద ప్రత్యేకత ఏంటంటే.. ఇందులో సాధారణ ఇనుప చైన్‌కు బదులుగా గేట్స్ కార్బన్ బెల్ట్ డ్రైవ్ సిస్టమ్‌ను ఉపయోగించారు. దీనివల్ల బైక్ నడిపేటప్పుడు గ్రీస్ లేదా ఆయిల్ పూయాల్సిన అవసరం ఉండదు, చైన్ నుంచి ఎలాంటి శబ్దాలు రాకుండా రైడింగ్ చాలా స్మూత్‌గా సాగుతుంది. భద్రత కోసం ముందు, వెనుక చక్రాలకు వైడ్ టైర్లతో పాటు పవర్‌ఫుల్ హైడ్రాలిక్ డిస్క్ బ్రేక్‌లను అందించారు. ఇది గుంతల రోడ్లపై కూడా కుదుపులు లేకుండా ప్రయాణాన్ని అందిస్తుంది.

దొంగతనం జరగకుండా యాంటీ-థెఫ్ట్ అలర్ట్
ఈ ఎలక్ట్రిక్ బైక్ కేవలం చూడటానికే కాదు.. టెక్నాలజీ పరంగా కూడా చాలా స్మార్ట్. ఇందులో SP Connect మౌంట్ సపోర్ట్ ఉంది, దీని ద్వారా మీ స్మార్ట్‌ఫోన్‌ను బైక్‌కు కనెక్ట్ చేసుకోవచ్చు. దీని ప్రత్యేక అప్లికేషన్ లో ఎన్నో అధునాతన ఫీచర్లు ఉన్నాయి. బైక్‌ను ఎవరైనా దొంగిలించడానికి ప్రయత్నిస్తే యజమాని ఫోన్‌కు వెంటనే థెఫ్ట్ అలర్ట్ అందుతుంది. అలాగే ఇందులో స్మార్ట్ అలారమ్, జీపీఎస్ లైవ్ ట్రాకింగ్, కారు లాగా ఆటో-లాకింగ్, డ్యూయల్ ఫ్రంట్ బీమ్ లైట్లు, వెనుక వైపు సేఫ్టీ లైట్లు వంటి ప్రీమియం ఫీచర్లు రైడర్లకు పూర్తి రక్షణను అందిస్తాయి.