Airtel : రూ. 200 లకే 30GB డేటా, 19 ఓటీటీలు ఉచితం.. ఎయిర్‌టెల్ యూజర్లకు బంపర్ ఆఫర్

Airtel : భారతీయ ప్రముఖ టెలికాం దిగ్గజం భారతీ ఎయిర్‌టెల్ తమ ప్రిపెయిడ్ వినియోగదారులకు మైండ్ బ్లోయింగ్ ఆఫర్‌ను అందుబాటులోకి తెచ్చింది. తక్కువ ఖర్చుతో ఎక్కువ వినోదాన్ని, అదనపు డేటాను కోరుకునే వారి కోసం రూ. 200లకే ప్రత్యేకంగా బాక్సాఫీస్ ప్యాక్‎ను పరిచయం చేసింది. వేర్వేరు ఓటీటీ సబ్‌స్క్రిప్షన్లను విడివిడిగా కొనుగోలు చేసే పనిలేకుండా, ఒకే రీఛార్జ్‌తో అన్ని ప్రముఖ ఎంటర్‌టైన్‌మెంట్ ప్లాట్‌ఫారమ్‌లకు షార్ట్-టర్మ్ యాక్సెస్ అందించడమే ఈ ప్లాన్ ప్రధాన ఉద్దేశం. కంపెనీ ప్రస్తుతం ఎంపిక చేసిన కస్టమర్లకు టెక్స్ట్ మెసేజ్‌ల ద్వారా ఈ ఆఫర్ గురించిన సమాచారాన్ని ప్రచారం చేస్తోంది.

30GB డేటా, 19 ఓటీటీ సర్వీసులు
ఈ రూ. 200 బాక్స్ ఆఫీస్ ప్యాక్‌లో వినియోగదారులకు మొత్తం 30GB హై-స్పీడ్ డేటా లభిస్తుంది. దీనికి తోడు అమెజాన్ ప్రైమ్, జీ5, జియోహాట్‌స్టార్ వంటి ప్రముఖ ఓటీటీ యాప్‌ల ప్రయోజనాలతో పాటు ఎయిర్‌టెల్ ఎక్స్‌స్ట్రీమ్ ప్లే ద్వారా లభించే మరో 16 ఓటీటీల సబ్‌స్క్రిప్షన్‌తో కలిపి మొత్తం 19 ఓటీటీ ఛానెళ్ల కంటెంట్‌ను ఉచితంగా వీక్షించే వెసులుబాటు లభిస్తుంది. అయితే మీ రీఛార్జ్ సర్కిల్‌ను బట్టి కంటెంట్ జాబితా మారవచ్చు కాబట్టి రీఛార్జ్ చేసుకునే ముందు ఎయిర్‌టెల్ యాప్‌లో పూర్తి వివరాలను సరిచూసుకోవడం మంచిది.

వ్యాలిడిటీ ఎంత? నిబంధనలు ఏంటి?
ఎయిర్‌టెల్ రూ. 200 ప్యాక్ వ్యాలిడిటీ 28 రోజుల పాటు పనిచేస్తుంది. ఈ 28 రోజులలో మీరు లభించిన 30GB డేటాను డైలీ లిమిట్ లేకుండా మీ ఇష్టం వచ్చినట్లు ఉపయోగించుకోవచ్చు. ఇక్కడ వినియోగదారులు గమనించాల్సిన ముఖ్యమైన విషయమేమిటంటే, ఇది కేవలం ఒక డేటా యాడ్-ఆన్ ప్యాక్ మాత్రమే. కాబట్టి ఇందులో అపరిమిత ఉచిత వాయిస్ కాలింగ్, డైలీ ఎస్ఎమ్‌ఎస్‌లు లేదా సాధారణ ప్లాన్ వ్యాలిడిటీ ప్రయోజనాలు లభించవు. ఈ ప్యాక్ ప్రయోజనాలను పొందడానికి మీ నంబర్‌పై ఇప్పటికే ఏదైనా ప్రాథమిక రీఛార్జ్ ప్లాన్ యాక్టివ్‌గా ఉండటం తప్పనిసరి.

OnePlus 16 : స్మార్ట్‌ఫోన్ లవర్స్‌కు క్రేజీ న్యూస్.. నెక్స్ట్ లెవెల్ గేమ్ టెక్నాలజీతో వన్ ప్లస్ 16 గ్రాండ్ లాంచ్

అమెజాన్ ప్రైమ్ మెంబర్‌షిప్ వివరాలు 
ఈ ప్యాక్‌లో లభించే అమెజాన్ ప్రైమ్ ప్రయోజనం పూర్తి స్థాయి ప్రైమ్ మెంబర్‌షిప్‌ రూపంలో వస్తుందా లేదా కేవలం ప్రైమ్ వీడియో మొబైల్ ఎడిషన్ రూపంలో లభిస్తుందా అనే విషయాన్ని ఎయిర్‌టెల్ తమ అధికారిక వెబ్‌సైట్‌లో స్పష్టంగా పేర్కొనలేదు. సాధారణంగా ఎయిర్‌టెల్ ప్రిపేడ్ రీఛార్జ్‌లతో ఇచ్చే మొబైల్ ఎడిషన్ కేవలం ఒక్క స్మార్ట్‌ఫోన్‌లో మాత్రమే స్ట్రీమింగ్ చేయడానికి వీలవుతుంది. కాబట్టి యాక్టివేట్ చేసుకునేటప్పుడు ఈ విషయాన్ని గమనించాల్సి ఉంటుంది.

రీఛార్జ్ చేయడం, ఓటీటీలు యాక్టివేట్ చేయడం ఎలా?
ఎయిర్‌టెల్ వినియోగదారులు తమ థాంక్స్ యాప్‎లోకి వెళ్లే బాక్స్ ఆఫీస్ ప్యాక్‌ను సెర్చ్ చేసి రీఛార్జ్ చేసుకోవచ్చు. లేదా ఎయిర్‌టెల్ పంపిన ప్రమోషనల్ మెసేజ్‌లలోని లింక్‌ ద్వారా నేరుగా పేమెంట్ చేయవచ్చు. రీఛార్జ్ పూర్తయిన తర్వాత ఓటీటీ బెనిఫిట్స్‌ను రీఛార్జ్ చేసుకున్న ఎయిర్‌టెల్ నంబర్ ద్వారానే యాప్‌లోని క్లెయిమ్ బెనిఫిట్స్ సెక్షన్ లోకి వెళ్లి మాన్యువల్‌గా యాక్టివేట్ చేసుకోవాల్సి ఉంటుంది.