OTT Releases this Week: ఓటీటీ లవర్స్‌కు పండగే.. ఈ వీకెండ్ డిఫరెంట్ జోనర్లలో 5 సరికొత్త సినిమాలు, సిరీస్‌లు

OTT Releases this week June 2026: వీకెండ్ వచ్చిందంటే చాలు కొత్త సినిమాలు, వెబ్ సిరీస్‌ల కోసం ఓటీటీ ప్లాట్‌ఫామ్స్ వైపు చూసే సినీ ప్రియుల నిరీక్షణకు తెరపడింది. ఈ వారం డిజిటల్ స్క్రీన్లపై ప్రేక్షకులను అలరించడానికి పలు ఆసక్తికరమైన చిత్రాలు విభిన్న జోనర్లలో విడుదలై స్ట్రీమింగ్ అవుతున్నాయి. హారర్ కామెడీల నుంచి మొదలుకొని రియాలిటీ షోలు, సస్పెన్స్ ఇన్వెస్టిగేషన్ థ్రిల్లర్లు, యాక్షన్ ఫాంటసీ సినిమాల వరకు అన్నీ అందుబాటులోకి వచ్చాయి. ఈ వీకెండ్‌ను పూర్తిగా ఎంటర్‌టైన్‌మెంట్‌తో నింపేయడానికి సిద్ధంగా ఉన్న ఆ టాప్ సినిమాల విశేషాలు ఇప్పుడు చూద్దాం.

భయపెడుతూ నవ్వించే అక్షయ్ కుమార్ భూత్ బంగ్లా..

బాలీవుడ్ స్టార్ హీరో అక్షయ్ కుమార్, ప్రముఖ దర్శకుడు ప్రియదర్శన్ కాంబినేషన్‌లో వచ్చిన సరికొత్త హారర్ కామెడీ చిత్రం భూత్ బంగ్లా. ఈ క్రేజీ మూవీ నెట్‌ఫ్లిక్స్ లో జూన్ 12 నుంచి స్ట్రీమింగ్ అవుతోంది. ఇందులో అక్షయ్‌తో పాటు పరేష్ రావల్, రాజ్‌కుమార్ యాదవ్, టబు వంటి భారీ తారాగణం నటించారు. తన తాతల కాలం నాటి పాత కోటలో డెస్టినేషన్ వెడ్డింగ్ ప్లాన్ చేసుకుని గ్రామానికి వెళ్ళిన అర్జున్ అనే యువకుడి చుట్టూ ఈ కథ తిరుగుతుంది. ఆ బంగ్లాలో ఉన్న దెయ్యాల వల్ల అతను ఎలాంటి ఇబ్బందులు పడ్డాడు, వాటిని ఎలా ఎదుర్కొన్నాడు అనేది నవ్వులు పూయిస్తూ చూపించారు.

జీ5 లో శిల్పా శెట్టి క్రేజీ రియాలిటీ షో  మా హై నా..

ప్రముఖ ఓటీటీ సంస్థ జీ5లో సరికొత్త రియాలిటీ వెబ్ సిరీస్ మా హై నా విడుదలైంది. బాలీవుడ్ స్టార్ నటి శిల్పా శెట్టి ముఖ్య పాత్రలో వ్యవహరిస్తున్న ఈ షో పూర్తిగా నేటి తరం సెలబ్రిటీలు, వారి తల్లుల మధ్య ఉన్న అనుబంధం చుట్టూ తిరుగుతుంది. సునీతా అహుజా, తాన్యా మిట్టల్, ఊర్వశి డోలకియా వంటి తారలతో కూడిన ఆరుగురు సెలబ్రిటీలు తమ అమ్మలతో కలిసి ఈ షోలో పాల్గొంటారు. సాంప్రదాయ వంటకాల సవాళ్లలో ఒకరితో ఒకరు పోటీ పడుతూ, వంట చేసే క్రమంలో అమ్మలతో జరిగే సరదా గొడవలు, భావోద్వేగాలను ఈ షోలో చాలా చక్కగా చూపించారు.

యూట్యూబ్ స్టార్‌గా మారిన కుర్రాడి కథ వైరల్ హిట్..

నెట్‌ఫ్లిక్స్ లో విడుదలైన మరో ఆసక్తికరమైన యానిమేటెడ్ యాక్షన్ సిరీస్ వైరల్ హిట్. ఇది సౌత్ కొరియాకు చెందిన ప్రముఖ వెబ్‌టూన్ హౌ టు ఫైట్ ఆధారంగా రూపొందించబడింది. నిరుపేద కుటుంబానికి చెందిన కోటా షిమురా అనే విద్యార్థి తన తల్లి వైద్య ఖర్చుల కోసం, పేదరికం నుంచి బయటపడటానికి తీవ్రంగా శ్రమిస్తుంటాడు. ఈ క్రమంలో పాఠశాలలో అతను చేసిన ఒక గొడవ అనుకోకుండా ఇంటర్నెట్‌లో లైవ్ స్ట్రీమ్ అయి వైరల్‌గా మారుతుంది. దీని ద్వారా వచ్చే ఆదాయాన్ని చూసిన కోటా.. డబ్బుల కోసం కెమెరా ముందే రౌడీలతో ఫైట్లు చేయడం ప్రారంభిస్తాడు. ఈ సిరీస్ యువతను బాగా ఆకట్టుకుంటోంది.

అమెజాన్ ప్రైమ్‌లో సస్పెన్స్ థ్రిల్లర్ రాఖ్..

మీకు క్రైమ్, ఇన్వెస్టిగేషన్ థ్రిల్లర్ సినిమాలు ఇష్టమైతే అమెజాన్ ప్రైమ్ వీడియోలో విడుదలైన రాఖ్ సినిమాను అస్సలు మిస్ అవ్వకండి. అలీ ఫజల్, సోనాలి బింద్రే, ఆకాష్ మఖిజా, అమీర్ బషీర్ ప్రధాన పాత్రల్లో నటించిన ఈ చిత్రానికి ప్రాషిత్ రాయ్ దర్శకత్వం వహించారు. 1970ల కాలం నాటి నేపథ్యంలో సాగే ఈ కథలో.. అపహరణకు గురైన ఇద్దరు టీనేజర్లను కనిపెట్టడానికి ఒక సిన్సియర్ పోలీస్ ఆఫీసర్ రంగంలోకి దిగుతాడు. ఈ శోధన క్రమంలో అతను ఎదుర్కొన్న హింసాత్మక సంఘటనలు, నేర ప్రపంచంలోని నల్లని నిజాలు ప్రేక్షకులను సీట్ ఎడ్జ్‌లో కూర్చోబెడతాయి.

దేవుడే లాయర్‌గా వచ్చిన సూర్య, త్రిషల కరుప్పు..

అమెజాన్ ప్రైమ్ వీడియోలో స్ట్రీమింగ్ అవుతున్న మరో భారీ యాక్షన్ అండ్ సోషియో ఫాంటసీ చిత్రం కరుప్పు. కోలీవుడ్ స్టార్ హీరో సూర్య, త్రిష కృష్ణన్, ఆర్‌జె బాలాజీ ప్రధాన పాత్రల్లో నటించిన ఈ చిత్రం ఒక తండ్రి, కూతురి సెంటిమెంట్ చుట్టూ తిరుగుతుంది. తన అనారోగ్యంతో ఉన్న కూతురి లివర్ ట్రాన్స్‌ప్లాంట్ ఆపరేషన్ కోసం దాచిపెట్టిన బంగారాన్ని కొందరు దుర్మార్గులు దొంగిలిస్తారు. బాధితుడు న్యాయం కోసం కోర్టులు, అధికారుల చుట్టూ తిరిగినా అవినీతి వ్యవస్థ వల్ల నిరాశే ఎదురవుతుంది. చివరికి అతను తన కులదైవమైన వెట్టై కరుప్పును వేడుకోగా.. ఆ దేవుడే ఒక పవర్‌ఫుల్ లాయర్ రూపంలో భూమికి వచ్చి అవినీతి తిమింగలాల అంతం చూస్తాడు. ఈ చిత్రం అద్భుతమైన యాక్షన్ సీన్లతో ప్రేక్షకులను కట్టిపడేస్తోంది.