Nokia 123 Shield Phone: చేతిలోంచి జారినా, నీళ్లలో మునిగినా నో ప్రాబ్లమ్.. టైప్-సి పోర్ట్‌తో నోకియా కొత్త ఫోన్ వచ్చేసింది!

HMD Global Launches Nokia 123 Shield Feature Phone: ప్రముఖ మొబైల్ బ్రాండ్ లైసెన్సింగ్ సంస్థ హెచ్‌ఎమ్‌డీ గ్లోబల్ నోకియా బ్రాండింగ్‌లో సరికొత్త రగ్గడ్ డిజైన్ ఫీచర్ ఫోన్‌ను నోకియా 123 షీల్డ్ పేరుతో అధికారికంగా గ్లోబల్ మార్కెట్లో ఆవిష్కరించింది. రఫ్ అండ్ టఫ్ వాడకానికి, అవుట్‌డోర్ వర్కర్లకు అనువుగా ఉండేలా ఈ ఫోన్‌ను అత్యంత తక్కువ ధరలోనే అన్ని రకాల ప్రతికూల వాతావరణ పరిస్థితులను తట్టుకునేలా రూపుదిద్దినట్లు కంపెనీ వెల్లడించింది.  

షీల్డ్ లాంటి మన్నిక, డిజైన్

ఈ ఫోన్ పేరులోనే ఉన్నట్లుగా ఇది ఒక రక్షణ కవచం (షీల్డ్) లాంటి గట్టి బాడీతో రూపొందించబడింది. వర్షం, నీటి జల్లులు, ఇసుక, తీవ్రమైన ధూళిని తట్టుకోవడానికి ఈ ఫోన్‌కు IP65 వాటర్ అండ్ డస్ట్ రెసిస్టెంట్ రేటింగ్ లభించింది. చేతిలో నుంచి జారకుండా ఉండేందుకు ఫోన్ ఇరువైపులా స్లిప్-రెసిస్టెంట్ టెక్స్చర్డ్ ఫినిషింగ్ అందించారు. అంతేకాకుండా పవర్ పోర్ట్, హెడ్‌ఫోన్ జాక్ ద్వారా లోపలికి తేమ లేదా ధూళి వెళ్లకుండా ప్రత్యేకమైన రబ్బర్ సీలింగ్ క్యాప్‌లను అమర్చడం విశేషం.   

డిస్‌ప్లే, ప్రాసెసింగ్ ఫీచర్లు

నోకియా 123 షీల్డ్ ఫోన్‌లో 2.4-ఇంచ్ QVGA డిస్‌ప్లే (320x240 పిక్సెల్స్ రిజల్యూషన్) ఇచ్చారు. ఇది యునిసోక్ SC6531E ప్రాసెసర్‌పై S30+ ఆపరేటింగ్ సిస్టమ్‌తో పనిచేస్తుంది. ఫోన్‌లో 4MB ర్యామ్, 4MB ఇంటర్నల్ స్టోరేజ్ అందించారు. మీరు పాటలు లేదా ఇతర ఫైళ్లను దాచుకోవడానికి మైక్రో SD కార్డ్ సహాయంతో స్టోరేజ్‌ను 32GB వరకు పెంచుకోవచ్చు. వెనుక భాగంలో ఒక బేసిక్ QVGA కెమెరాతో పాటు నోకియా 110 ఫోన్ కంటే ఏకంగా 300% ఎక్కువ వెలుగును ఇచ్చే శక్తివంతమైన ఎల్‌ఈడీ టార్చ్ లైట్‌ను అమర్చారు.   

OPPO Find X10 : ఒప్పో నుంచి సరికొత్త లుక్‌తో ఫైండ్ X10 సిరీస్.. కెమెరా డిజైన్ లీక్

19 రోజుల బ్యాటరీ లైఫ్, సిగ్నల్ కనెక్టివిటీ  

ఈ ఫీచర్ ఫోన్‌కు అత్యంత కీలకమైన ఆకర్షణ దీని 1,750 mAh రిమూవబుల్ బ్యాటరీ. ఒక్కసారి ఫుల్ ఛార్జ్ చేస్తే ఏకంగా 19 రోజుల వరకు స్టాండ్‌బై టైమ్‌ను, అలాగే 27.9 గంటల పాటు నాన్‌స్టాప్ టాక్ టైమ్‌ను ఇస్తుందని కంపెనీ చెబుతోంది. దీని కోసం ఆధునిక USB Type-C ఛార్జింగ్ పోర్ట్‌ను ఇచ్చారు. సాధారణ 2G ఫీచర్ ఫోన్లతో పోలిస్తే రద్దీగా ఉండే ప్రదేశాల్లో కూడా నాణ్యమైన, స్పష్టమైన వాయిస్ కాల్స్ కోసం ఇందులో మెరుగైన ఎఫ్‌పిసి యాంటెన్నా వ్యవస్థను ఉపయోగించారు.   

అంచనా ధర, లభ్యత 

హెచ్‌ఎమ్‌డీ గ్లోబల్ ఇంకా ఈ ఫోన్, అధికారిక భారతీయ ధరను ప్రకటించనప్పటికీ, యూరప్‌లోని కొన్ని రీటైలర్ సైట్లలో ఇది 35 నుంచి 40 యూరోల (భారత కరెన్సీలో సుమారు రూ.3,500 నుంచి రూ.4,000 మధ్య) ధరకు లిస్ట్ అయింది. త్వరలోనే ఈ బడ్జెట్ రగ్గడ్ ఫోన్ భారతీయ మార్కెట్లో కూడా కొనుగోలుకు అందుబాటులోకి రానుంది.