Budget 5G Phones : మోటో జీ37 పవర్, ఒప్పో K14x, శామ్‌సంగ్ ఎం17 ఫోన్ల మధ్య గట్టి పోటీ.. ఏది కొనడం బెస్ట్?

Budget 5G Phones : భారత బడ్జెట్ స్మార్ట్‌ఫోన్ మార్కెట్లో 5జీ ఫోన్ల హవా నడుస్తోంది. మోటోరోలా సంస్థ తన సరికొత్త పవర్‌ఫుల్ స్మార్ట్‌ఫోన్ మోటో జీ37 పవర్‎ను భారీ బ్యాటరీతో ఇండియాలో లాంచ్ చేసింది. రూ.15,000 బడ్జెట్ పరిధిలో లభించే ఈ ఫోన్.. మార్కెట్లో ఇప్పటికే మంచి డిమాండ్ ఉన్న ఒప్పో K14x 5G, శామ్‌సంగ్ గెలాక్సీ M17 5G ఫోన్లకు గట్టి పోటీనిస్తోంది. ఈ మూడు ఫోన్లలోనూ 5జీ కనెక్టివిటీ, 120Hz హై రిఫ్రెష్ రేట్ డిస్‌ప్లే, 50 మెగాపిక్సెల్ ప్రధాన కెమెరా వంటి సమాన ఫీచర్లు ఉన్నప్పటికీ.. బ్యాటరీ, ప్రాసెసర్, సాఫ్ట్‌వేర్ అప్‌డేట్ల విషయంలో చాలా తేడాలు ఉన్నాయి. వీటిలో ఏ ఫోన్ బెస్ట్ అనేది పారాగ్రాఫ్ వైజ్ తెలుసుకుందాం.

ధరల పరంగా ఏ ఫోన్ బడ్జెట్ ఫ్రెండ్లీగా ఉంది?
మొదటగా మోటో జీ37 పవర్ ధరలను పరిశీలిస్తే.. దీని బేస్ వేరియంట్ 4GB ర్యామ్ + 128GB స్టోరేజ్ ధర రూ.15,999 గా ఉంది. అలాగే 8GB ర్యామ్ + 128GB స్టోరేజ్ టాప్ వేరియంట్ ధర రూ.18,999గా నిర్ణయించారు. ఈ ఫోన్ పాంటోన్ కాప్రి, పాంటోన్ ఇంపెనెట్రబుల్, పాంటోన్ నాటికల్ బ్లూ వంటి అదిరిపోయే ప్రీమియం కలర్ ఆప్షన్లలో లభిస్తుంది.

మరోవైపు ఒప్పో K14x 5G ఫోన్ ప్రారంభ ధర కొంచెం తక్కువగా ఉంది. దీని 4GB ర్యామ్ + 128GB స్టోరేజ్ మోడల్ ధర రూ.14,999 కాగా, 6GB ర్యామ్ + 128GB స్టోరేజ్ వేరియంట్ ధర రూ.16,999గా ఉంది. ఈ హ్యాండ్‌సెట్ ఐసీ బ్లూ, ప్రిజం వైలెట్ రంగులలో కస్టమర్లకు అందుబాటులో ఉంటుంది.

ఇక శామ్‌సంగ్ గెలాక్సీ M17 5G ధరల విషయంలో కొద్దిగా మార్పులు జరిగాయి. లాంచ్ సమయంలో దీని బేస్ మోడల్ ధర రూ.12,499గా ఉన్నప్పటికీ, ప్రస్తుతం పెరిగిన ధరల ప్రకారం 4GB ర్యామ్ + 128GB స్టోరేజ్ వేరియంట్ రూ.14,499 కి లభిస్తోంది. అలాగే 6GB ర్యామ్ మోడల్ ధర రూ.16,499, 8GB ర్యామ్ టాప్ మోడల్ ధర రూ.18,499గా ఉంది. ఇది మూన్‌లైట్ సిల్వర్, సఫైర్ బ్లాక్ కలర్స్‌లో లభిస్తుంది.

Realme : రియల్‌మీ నుంచి అదిరిపోయే బడ్స్ లాంచ్.. 50 గంటల నాన్‌స్టాప్ మ్యూజిక్

Budget Smartphones : రూ. 11 వేల లోపు బెస్ట్ ఫోన్ ఏది? హెచ్ఎండీ, రెడ్‌మీ, లావా మధ్య బిగ్ ఫైట్

డిస్‌ప్లే, సాఫ్ట్‌వేర్ అప్‌డేట్లలో ఏది తోపు?
డిస్‌ప్లే, ఆపరేటింగ్ సిస్టమ్ విషయానికి వస్తే ఈ మూడింటి మధ్య చాలా వ్యత్యాసం ఉంది. మోటో జీ37 పవర్ ఫోన్ 6.6 ఇంచుల HD+ LCD స్క్రీన్‌తో వస్తుంది. ఇందులో గొరిల్లా గ్లాస్ 7i ప్రొటెక్షన్, 1,050 నిట్స్ బ్రైట్‌నెస్ ఉన్నాయి. అన్నింటికంటే ముఖ్యంగా ఈ ఫోన్ లేటెస్ట్ ఆండ్రాయిడ్ 16 ఆపరేటింగ్ సిస్టమ్‌పై రన్ అవుతుంది. దీనికి ఆండ్రాయిడ్ 17 వరకు ఒక మేజర్ అప్‌డేట్ లభిస్తుంది. అలాగే దీనికి IP64 రేటింగ్ ఉంది.

ఒప్పో K14x 5G మోడల్‌లో కొంచెం పెద్దదైన 6.75 ఇంచుల HD+ LCD డిస్‌ప్లేను అమర్చారు. ఇది 1,125 నిట్స్ పీక్ బ్రైట్‌నెస్‌ను అందిస్తుంది. సాఫ్ట్‌వేర్ పరంగా ఇది ఆండ్రాయిడ్ 15 ఆధారిత కలర్ ఓఎస్ 15.0 పై పనిచేస్తుంది. ధూళి, నీటి తుంపర్ల నుంచి రక్షణ కోసం దీనికి కూడా IP64 రేటింగ్ ఇచ్చారు.

ఇక స్క్రీన్ క్వాలిటీలో శామ్‌సంగ్ గెలాక్సీ M17 5G అన్నింటికంటే ముందంజలో ఉంది. ఎందుకంటే ఇందులో 6.7 ఇంచుల ఫుల్-HD+ సూపర్ అమోలెడ్ ప్రీమియం డిస్‌ప్లేను ఇచ్చారు. దీనికి గొరిల్లా గ్లాస్ విక్టస్ ప్రొటెక్షన్, 1,100 నిట్స్ బ్రైట్‌నెస్ ఉన్నాయి. ఇది ఆండ్రాయిడ్ 15 ఆధారిత వన్ యూఐ 7 పై నడుస్తుంది. శామ్‌సంగ్ ఈ ఫోన్‌కు ఏకంగా 6 సంవత్సరాల పాటు ఆండ్రాయిడ్ ఓఎస్ అప్‌డేట్లు, సెక్యూరిటీ అప్‌డేట్లు ఇస్తామని ప్రకటించి అందరినీ ఆశ్చర్యపరిచింది. దీనికి IP54 రేటింగ్ ఉంది.

ప్రాసెసర్ పవర్‌ప్లే, బ్యాటరీ సామర్థ్యం ఎలా ఉంది?
పెర్ఫార్మెన్స్, బ్యాటరీ పరంగా మోటో జీ37 పవర్ ఒక నిజమైన బ్యాటరీ కింగ్ అని చెప్పవచ్చు. ఈ ఫోన్‌లో మరే బడ్జెట్ ఫోన్లో లేని విధంగా ఏకంగా 7,000mAh భారీ బ్యాటరీని అమర్చారు. ఇది 30W ఫాస్ట్ ఛార్జింగ్, 6W రివర్స్ ఛార్జింగ్‌కు సపోర్ట్ చేస్తుంది. దీని లోపల సరికొత్త మీడియాటెక్ డైమెన్సిటీ 6400 ప్రాసెసర్ ఉంది. ఇది 8GB వరకు ఎల్‌పీడీడీఆర్4ఎక్స్ ర్యామ్, UFS 2.2 స్టోరేజ్‌ను కలిగి ఉంటుంది.

ఒప్పో K14x 5G కూడా బ్యాటరీ పరంగా గట్టి పోటీ ఇస్తోంది. ఇందులో 6,500mAh సామర్థ్యం గల బ్యాటరీ ఉంది. అయితే ఇది మోటో కంటే వేగంగా ఛార్జ్ అయ్యే 45W ఫాస్ట్ ఛార్జింగ్‌కు సపోర్ట్ చేస్తుంది. ఈ ఫోన్ మీడియాటెక్ డైమెన్సిటీ 6300 చిప్‌సెట్‌తో 6GB వరకు ర్యామ్‌ను కలిగి ఉంటుంది.

ఇక శామ్‌సంగ్ గెలాక్సీ M17 5G విషయానికి వస్తే.. ఇందులో సాధారణ 5,000mAh బ్యాటరీ మాత్రమే ఉంది. ఇది 25W వైర్డ్ ఫాస్ట్ ఛార్జింగ్‌కు సపోర్ట్ చేస్తుంది. పెర్ఫార్మెన్స్ కోసం శామ్‌సంగ్ ఇందులో సొంత ఎగ్జినోస్ 1330 ప్రాసెసర్‌ను ఉపయోగించింది. దీనితో పాటు 8GB వరకు ర్యామ్ మరియు 128GB ఇంటర్నల్ స్టోరేజ్ ఆప్షన్లు ఉన్నాయి.

కెమెరా, సైజుల పరంగా ఏ ఫోన్ బెస్ట్?
ఫోటోగ్రఫీ విషయానికి వస్తే శామ్‌సంగ్ స్పష్టమైన ఆధిక్యతను ప్రదర్శిస్తోంది. శామ్‌సంగ్ గెలాక్సీ M17 5G వెనుక భాగంలో ట్రిపుల్ కెమెరా సెటప్ ఉంది. ఇందులో ఆప్టికల్ ఇమేజ్ స్టెబిలైజేషన్ (OIS) కలిగిన 50 మెగాపిక్సెల్ మెయిన్ కెమెరా, 5 మెగాపిక్సెల్ అల్ట్రావైడ్ లెన్స్, 2 మెగాపిక్సెల్ మాక్రో కెమెరా ఉన్నాయి. సెల్ఫీల కోసం 13 మెగాపిక్సెల్ ఫ్రంట్ కెమెరా ఇచ్చారు. ఈ ఫోన్ చాలా స్లిమ్‌గా (7.5mm పొడవు), 192 గ్రాముల తేలికైన బరువుతో స్మార్ట్‌గా ఉంటుంది.

మోటో జీ37 పవర్ వెనుక వైపు కేవలం డ్యూయల్ కెమెరా మాత్రమే ఉంది. ఇందులో 50 మెగాపిక్సెల్ మెయిన్ కెమెరాతో పాటు ఒక లైట్ సెన్సార్‌ను ఇచ్చారు. సెల్ఫీల కోసం 8 మెగాపిక్సెల్ కెమెరా మాత్రమే ఉంది. భారీ బ్యాటరీ కారణంగా ఈ ఫోన్ కొంచెం లావుగా (8.89mm), 215 గ్రాముల బరువుతో కాస్త బరువుగా అనిపిస్తుంది.

ఒప్పో K14x 5G లో కూడా డ్యూయల్ కెమెరా సెటప్ ఉంది. ఇందులో 50 మెగాపిక్సెల్ ప్రైమరీ కెమెరా, 2 మెగాపిక్సెల్ మోనోక్రోమ్ సెన్సార్ ఉన్నాయి. ముందర భాగంలో కేవలం 5 మెగాపిక్సెల్ సెల్ఫీ కెమెరా మాత్రమే ఇచ్చారు. ఈ ఫోన్ థిక్‌నెస్ 8.6mm కాగా, బరువు దాదాపు 212 గ్రాములు ఉంటుంది.

ఈ మూడింటిలో ఏ ఫోన్ కొనాలి?
చివరగా.. మీ ప్రాధాన్యతలను బట్టి సరైన ఫోన్‌ను ఎంచుకోవాలి. ఒకవేళ మీకు చార్జింగ్ ఒక్కసారి పెడితే మూడు రోజుల పాటు రావాలి, పవర్‌బ్యాంక్ లాగా వేరే ఫోన్లను కూడా చార్జ్ చేయాలి అనుకుంటే కళ్ళు మూసుకుని మోటో జీ37 పవర్ ఫోన్ కొనేయవచ్చు. ఎందుకంటే ఇందులో అధునాతన డైమెన్సిటీ 6400 చిప్‌సెట్, 7,000mAh మెగా బ్యాటరీ ఉన్నాయి.

ఒకవేళ మీకు బ్యాటరీ లైఫ్ బాగుండాలి, అదే సమయంలో చార్జింగ్ చాలా స్పీడ్‌గా ఎక్కాలి అనుకుంటే 45W ఫాస్ట్ చార్జింగ్ ఉన్న ఒప్పో K14x 5G సరైన ఛాయిస్ అవుతుంది. అయితే మీకు బ్యాటరీ సాధారణంగా ఉన్నా పర్లేదు కానీ.. సూపర్ అమోలెడ్ స్క్రీన్ కావాలి, ఓఐఎస్ కెమెరాతో అల్ట్రావైడ్ ఫోటోలు తీయాలి. రాబోయే 6 సంవత్సరాల పాటు సాఫ్ట్‌వేర్ అప్‌డేట్లు రావాలి అనుకుంటే శామ్‌సంగ్ గెలాక్సీ M17 5G అన్ని విధాలా ది బెస్ట్ ఆప్షన్ అని చెప్పవచ్చు.