Redmi 17 4G : రెండు రోజులు ఛార్జింగ్ పెట్టడం మర్చిపోయినా పర్లేదు... షావోమి నుంచి 7,500mAh బ్యాటరీ ఫోన్

Redmi 17 4G :  ప్రముఖ స్మార్ట్‌ఫోన్ తయారీ సంస్థ షావోమి తమ బడ్జెట్ సిరీస్‌లో మరో పవర్‌ఫుల్ ఫోన్‌ను మార్కెట్‌లోకి తెచ్చేందుకు సిద్ధమవుతోంది. రెడ్‌మీ 17 4G పేరుతో రానున్న ఈ కొత్త స్మార్ట్‌ఫోన్‌కు సంబంధించిన పూర్తి వివరాలు అధికారిక లాంచ్‌కి ముందే బయటికొచ్చాయి. ప్రముఖ టిప్‌స్టర్ సుధాన్షు అంబోరే (@Sudhanshu1414) ఈ ఫోన్ స్పెసిఫికేషన్ షీట్‌ను X వేదికగా షేర్ చేశారు. దీని ప్రకారం ఈ ఫోన్ భారీ బ్యాటరీ,పెద్ద డిస్‌ప్లేతో వినియోగదారులను ఆకట్టుకోనుంది.

బిగ్ డిస్‌ప్లే.. బెస్ట్ స్క్రీన్ ప్రొటెక్షన్
ఈ స్మార్ట్‌ఫోన్ విజువల్ ఎక్స్‌పీరియన్స్ పరంగా చాలా బాగుండనుంది. ఇందులో 6.9 అంగుళాల HD+ డిస్‌ప్లే ఇచ్చారు. ఇది 720x1600 పిక్సెల్స్ రెసొల్యూషన్‌తో పాటు, స్మూత్ పర్‌ఫార్మెన్స్ కోసం 120Hz ఎడాప్టివ్ రిఫ్రెష్ రేట్‌కు సపోర్ట్ చేస్తుంది. ఈ స్క్రీన్ 825 నిట్స్ వరకు పీక్ బ్రైట్‌నెస్‌ను అందిస్తుంది. అంతేకాకుండా కళ్ళకు రక్షణగా TÜV Rheinland సర్టిఫికేషన్, డిస్ప్లే దెబ్బతినకుండా గొరిల్లా గ్లాస్ 7i ప్రొటెక్షన్ కూడా పొందుపరిచారు. ఈ ఫోన్ ఆక్ గ్రీన్, డీప్ బ్లూ, బ్లాక్, లోటస్ పర్పుల్ రంగుల్లో రానుంది. ఫోన్ బ్యాక్ సైడ్ డైనమిక్ RGB లైట్ ఉండటం విశేషం. నీరు, ధూళి నుంచి రక్షణ కోసం IP64 రేటింగ్ కూడా ఇచ్చారు.

పవర్‌ఫుల్ ప్రాసెసర్.. రకరకాల వేరియంట్లు
పర్‌ఫార్మెన్స్ విషయానికి వస్తే, రెడ్‌మీ 17 4G ఫోన్ మీడియాటెక్ హెలియో G91 ఆల్ట్రా చిప్‌సెట్‌తో రన్ అవుతుంది. ఇది నాలుగు వేరియంట్లలో లభించనుంది: 4GB+128GB, 4GB+256GB, 6GB+128GB, 6GB+256GB. ఇందులో LPDDR4X ర్యామ్, eMMC 5.1 స్టోరేజ్ టెక్నాలజీ వాడారు. అదనంగా 12GB వరకు వర్చువల్ ర్యామ్ ఎక్స్‌పాన్షన్ సపోర్ట్ ఉంది. ఇక ఆపరేటింగ్ సిస్టమ్ విషయానికొస్తే ఇది లేటెస్ట్ HyperOS 3 పై పనిచేస్తుంది.

Redmi Note 17 : స్మార్ట్‌ఫోన్ మార్కెట్లో సునామీ.. 8,000mAh బ్యాటరీతో వస్తున్న రెడ్‌మీ నోట్ 17

7,500mAh బ్యాటరీ.. ఫాస్ట్ ఛార్జింగ్ సపోర్ట్
ఈ ఫోన్‌లో అత్యంత ప్రధానమైన విశేషం దీని బ్యాటరీనే. ఏకంగా 7,500mAh కెపాసిటీ గల భారీ బ్యాటరీని ఇచ్చారు. దీనికి తోడు 45W టైప్-సి ఫాస్ట్ ఛార్జింగ్ సపోర్ట్ ఉంటుంది. ఒకసారి ఛార్జ్ చేస్తే రెండు మూడు రోజుల పాటు నిరంతరంగా వాడుకోవచ్చు. ఫోన్ కొలతల విషయానికి వస్తే 170.12 x 78.42 x 8.8 మిమీ సైజుతో, 232 గ్రాముల బరువు ఉంటుంది.

50MP కెమెరా.. కనెక్టివిటీ ఫీచర్లు
కెమెరా సెటప్ పరంగా చూస్తే వెనుక వైపు f/1.8 అపెర్చర్‌తో 50 మెగాపిక్సెల్ ప్రైమరీ కెమెరాతో పాటు మరొక సెకండరీ కెమెరా ఉండనుంది. సెల్ఫీలు, వీడియో కాల్స్ కోసం ముందు భాగంలో 8 మెగాపిక్సెల్ కెమెరా అందించారు. సెక్యూరిటీ కోసం సైడ్-మౌంటెడ్ ఫింగర్‌ప్రింట్ సెన్సార్, AI ఫేస్ అన్‌లాక్ ఉన్నాయి. డ్యూయల్ బ్యాండ్ వైఫై, ఇన్‌ఫ్రారెడ్ బ్లాస్టర్, NFC వంటి అన్ని అవసరమైన కనెక్టివిటీ ఫీచర్లు కూడా ఇందులో కలవు.