రెడ్‌మీ K90 మ్యాక్స్ సంచలనం.. ఫోన్‌లోనే ఫ్యాన్.. 100 సెకన్లలోనే వేడిని తగ్గించే అదిరిపోయే టెక్నాలజీ!

షావోమీ సబ్ బ్రాండ్ రెడ్మీ నుంచి మరో సెన్సేషనల్ స్మార్ట్‌ఫోన్ మార్కెట్లోకి రావడానికి సిద్ధమైంది. అక్టోబర్ 2025లో రిలీజ్ అయిన రెడ్మీ K90 సిరీస్‌కు కొనసాగింపుగా ఇప్పుడు 'రెడ్మీ K90 మ్యాక్స్' మోడల్‌ను ఈ నెల చివరలో లాంచ్ చేస్తున్నట్లు కంపెనీ అధికారికంగా ప్రకటించింది. ఈ విషయాన్ని షావోమీ గ్రూప్ ప్రెసిడెంట్ లు వీబింగ్ సోషల్ మీడియా ప్లాట్‌ఫామ్ వీబో వేదికగా షేర్ చేశారు. ప్రస్తుతానికి మార్కెట్లో ఉన్న K90, K90 ప్రో మ్యాక్స్ మోడల్స్‌కు ఇది ఒక పవర్‌ఫుల్ అప్‌గ్రేడ్‌లా కనిపిస్తోంది. ముఖ్యంగా గేమింగ్ ప్రియులను టార్గెట్ చేస్తూ ఈ ఫోన్‌ను అత్యంత శక్తివంతమైన ఫీచర్లతో డిజైన్ చేసినట్లు తెలుస్తోంది.

ఈ స్మార్ట్‌ఫోన్ ప్రత్యేకత గురించి చెప్పాలంటే ఇందులో మొదటిసారిగా రెడ్మీ సిరీస్‌లో 'యాక్టివ్ ఎయిర్ కూలింగ్' సిస్టమ్‌ను ప్రవేశపెడుతున్నారు. గేమింగ్ ఆడేటప్పుడు ఫోన్ వేడెక్కడం అనేది పెద్ద సమస్య, దాన్ని పరిష్కరించడానికి కంపెనీ ఒక రీడిజైన్ చేసిన ఇంటర్నల్ ఫ్యాన్, సరికొత్త ఎయిర్‌ఫ్లో నిర్మాణాన్ని ఇందులో అమర్చింది. హై-లోడ్ కండిషన్స్‌లో కూడా కేవలం 100 సెకన్ల వ్యవధిలోనే ఫోన్ ఉష్ణోగ్రతను 10 డిగ్రీల సెల్సియస్ వరకు తగ్గించగలదని కంపెనీ ధీమా వ్యక్తం చేస్తోంది. ఎక్కువ సేపు భారీ గ్రాఫిక్స్ ఉన్న గేమ్స్ ఆడేవారికి ఈ కూలింగ్ టెక్నాలజీ ఒక వరప్రసాదంలా మారుతుందనడంలో ఎటువంటి సందేహం లేదు.

కూలింగ్ సిస్టమ్ నిర్మాణాన్ని గమనిస్తే ఇందులో 18.1 మిమీ పరిమాణం గల ఒక భారీ ఫ్యాన్‌ను ఉపయోగించారు. సాధారణంగా స్మార్ట్‌ఫోన్లలో ఉండే కూలింగ్ సొల్యూషన్స్ కంటే ఇది ఆరు శాతం పెద్దదిగా ఉండటమే కాకుండా 1.3 రెట్లు ఎక్కువ గాలిని లోపలికి పంపగలదు. వర్టికల్ ఇన్‌టేక్, ఫార్వర్డ్ టిల్టెడ్ ఫ్యాన్ బ్లేడ్స్ వల్ల గాలి ప్రసరణ చాలా సమర్థవంతంగా సాగుతుంది. ఒక రకమైన వోర్టెక్స్ స్టైల్ ఎయిర్ డక్ట్, మెటల్ గైడ్ ఫిన్స్ సాయంతో ప్రాసెసర్ వంటి వేడిని పుట్టించే భాగాల వైపు గాలిని నేరుగా మళ్లించడం వల్ల ఫోన్ పెర్ఫార్మెన్స్ అస్సలు తగ్గదు.

ఈ అధునాతన కూలింగ్ సిస్టమ్‌ను షావోమీ కేవలం యాంత్రికంగా కాకుండా ఏఐ సిమ్యులేషన్ ఆధారంగా అభివృద్ధి చేసింది. దీనివల్ల గాలి ప్రయాణించే మార్గం, ఫోన్ లోపలి స్ట్రక్చర్ మరియు థర్మల్ ఎఫిషియెన్సీ మెరుగయ్యాయి. సాధారణంగా ఫ్యాన్ ఉన్నప్పుడు శబ్దం ఎక్కువగా వస్తుందనే భయం ఉంటుంది, కానీ ఈ మోడల్‌లో నాయిస్ కంట్రోల్‌ను చాలా బాగా హ్యాండిల్ చేసినట్లు కంపెనీ ప్రతినిధులు చెబుతున్నారు. అత్యంత నిశ్శబ్దంగా ఉంటూనే ఫోన్‌ను చల్లబరచడం దీని ప్రధాన ఉద్దేశ్యం. ఆర్టిఫిషియల్ ఇంటెలిజెన్స్ వాడటం వల్ల హీట్ మేనేజ్‌మెంట్ అనేది మునుపటి కంటే చాలా తెలివిగా పనిచేస్తుంది.

హార్డ్‌వేర్ పరంగా చూస్తే రెడ్మీ K90 మ్యాక్స్ నెక్స్ట్ జనరేషన్ ఫ్లాగ్‌షిప్ ప్రాసెసర్‌తో వస్తోంది. ఇది డ్యూయల్ కోర్ పెర్ఫార్మెన్స్ ఆర్కిటెక్చర్‌ను కలిగి ఉంటుంది, దీనివల్ల మల్టీ టాస్కింగ్ చాలా స్మూత్‌గా సాగుతుంది. డిస్‌ప్లే విషయంలో కూడా ఎక్కడా తగ్గకుండా 165Hz రిఫ్రెష్ రేట్‌ను అందించారు. ఈ ఫోన్ కేవలం వేగం కోసమే కాకుండా ఈ-స్పోర్ట్స్ అవసరాలకు అనుగుణంగా టచ్ రెస్పాన్స్, నెట్‌వర్క్ స్టెబిలిటీ, ఆడియో క్వాలిటీ ఇంకా కళ్లకు రక్షణ ఇచ్చే ఐ ప్రొటెక్షన్ ఫీచర్లతో పక్కాగా ఆప్టిమైజ్ అయింది. ప్రొఫెషనల్ గేమర్స్ ఆశించే అన్ని హంగులు ఈ ఫోన్‌లో ఉన్నాయి.

ఫోన్ వెనుక వైపు డిజైన్ గురించి మాట్లాడితే ఎడమ వైపు టాప్ కార్నర్‌లో నిలువుగా అమర్చిన డ్యూయల్ రియర్ కెమెరా సెటప్ కనిపిస్తుంది. దాని పక్కనే కుడి వైపున మనకు యాక్టివ్ కూలింగ్ ఫ్యాన్ కనిపిస్తూ ఫోన్‌కు ఒక యూనిక్ లుక్ ఇస్తోంది. ఈ గేమింగ్ పవర్‌హౌస్ ఫోన్ గురించిన మరిన్ని వివరాలు, లాంచ్ డేట్, ధర వంటి విషయాలు త్వరలోనే వెల్లడి కానున్నాయి. మార్కెట్లో ఇప్పటికే ఉన్న ఇతర గేమింగ్ ఫోన్లకు గట్టి పోటీ ఇవ్వడానికి రెడ్మీ K90 మ్యాక్స్ సిద్ధమవుతోంది. టెక్ లవర్స్ అందరూ ఇప్పుడు ఈ స్మార్ట్‌ఫోన్ అధికారిక ఎంట్రీ కోసం ఆసక్తిగా ఎదురుచూస్తున్నారు.