గెలాక్సీ S27 ప్రో వచ్చేస్తోంది.. ఎస్-పెన్ లేకపోయినా ఆల్ట్రా రేంజ్ ఫీచర్లు.. ప్రైవసీ డిస్‌ప్లేతో సరికొత్త సంచలనం..!

శాంసంగ్ కంపెనీ మొబైల్ మార్కెట్లో తన సరికొత్త వ్యూహాలతో ఎప్పుడూ ట్రెండ్ సెట్ చేస్తూనే ఉంటుంది. ఈ ఏడాది ఫిబ్రవరిలో జరిగిన గెలాక్సీ అన్‌ప్యాక్డ్ 2026 ఈవెంట్‌లో గెలాక్సీ ఎస్26 సిరీస్‌ను గ్రాండ్‌గా లాంచ్ చేసిన సంగతి మనందరికీ తెలిసిందే. ఈ సిరీస్‌లో ప్రస్తుతం గెలాక్సీ ఎస్26, గెలాక్సీ ఎస్26 ప్లస్,  గెలాక్సీ ఎస్26 అల్ట్రా అనే మూడు పవర్‌ఫుల్ మోడల్స్ అందుబాటులో ఉన్నాయి. వాస్తవానికి ఎస్26 సిరీస్‌లోనే ప్లస్ మోడల్‌ను తీసేసి ప్రో వెర్షన్‌ను ప్రవేశపెడతారని అప్పట్లో సోషల్ మీడియాలో తెగ ప్రచారం జరిగింది. కానీ టెక్ దిగ్గజం శాంసంగ్ చివరి నిమిషంలో ఆ ప్లాన్స్‌ను పక్కన పెట్టడంతో వినియోగదారులు కేవలం పాత ఫార్మాట్‌లోని మూడు ఫోన్లతోనే సరిపెట్టుకోవాల్సి వచ్చింది.

వచ్చే ఏడాది ప్రారంభంలో రాబోయే శాంసంగ్ గెలాక్సీ ఎస్27 సిరీస్‌పై ఇప్పుడే అంచనాలు భారీగా పెరిగిపోయాయి. తాజా సమాచారం ప్రకారం వచ్చే ఏడాది ఈ లైనప్‌లో ఎవరూ ఊహించని విధంగా ఒక కొత్త 'ప్రో' మోడల్‌ను శాంసంగ్ పరిచయం చేయబోతోంది. దక్షిణ కొరియాకు చెందిన ప్రసిద్ధ పబ్లికేషన్ ఈటీ న్యూస్ అందించిన వివరాల ప్రకారం గెలాక్సీ ఎస్27 ప్రో మోడల్ ఈ సిరీస్‌లో నాలుగో ఫోన్‌గా జాయిన్ కానుంది. అంటే ఎప్పటిలాగే వచ్చే ఎస్27, ఎస్27 ప్లస్, ఎస్27 అల్ట్రా మోడల్స్‌తో పాటు అదనంగా ఈ ప్రో వెర్షన్ కూడా మార్కెట్లోకి అడుగుపెట్టనుంది. ప్రీమియం సెగ్మెంట్‌లో మరిన్ని ఆప్షన్లు కోరుకునే యూజర్ల కోసం శాంసంగ్ ఈ నిర్ణయం తీసుకున్నట్లు తెలుస్తోంది.

ఈ కొత్త గెలాక్సీ ఎస్27 ప్రో మోడల్ ఫీచర్ల పరంగా ఎస్27 ప్లస్ కంటే కాస్త పైన అలాగే ఎస్27 అల్ట్రా కంటే కొంచెం కింద ఉండేలా డిజైన్ చేస్తున్నారు. ముఖ్యంగా ఈ ఫోన్ స్పెసిఫికేషన్లు దాదాపు అల్ట్రా మోడల్‌కు సమానంగా ఉండే అవకాశం ఉంది. అయితే అల్ట్రా మోడల్‌కు ఉండే ప్రత్యేక గుర్తింపు అయిన ఎస్-పెన్ స్టైలస్ సపోర్ట్ మాత్రం ఈ ప్రో వెర్షన్‌లో ఉండకపోవచ్చు. దీనివల్ల భారీ స్క్రీన్,టాప్ ఎండ్ కెమెరా ఫీచర్లు కావాలి కానీ పెన్నుతో అవసరం లేదనుకునే వారికి ఇది ఒక బెస్ట్ ఛాయిస్ అవుతుంది. హై-ఎండ్ మోడల్స్ సంఖ్యను పెంచడం ద్వారా గెలాక్సీ సిరీస్‌ను మరింత పటిష్టం చేయాలని శాంసంగ్ భావిస్తోంది.

టెక్నాలజీ పరంగా చూస్తే ఈ ఫోన్‌లో 'ప్రైవసీ డిస్ప్లే' అనే అద్భుతమైన ఫీచర్‌ను శాంసంగ్ హైలైట్ చేయబోతోంది. ఈ ఏడాది వచ్చిన గెలాక్సీ ఎస్26 అల్ట్రాలో మాత్రమే కనిపించిన ఈ హార్డ్‌వేర్ ఆధారిత ప్రైవసీ ఫీచర్‌ను ఇప్పుడు ప్రో మోడల్‌కు కూడా విస్తరించనున్నారు. వైడ్ యాంగిల్, నారో యాంగిల్ ఎల్ఈడి టెక్నాలజీని ఉపయోగించి పక్కన ఉన్న వారికి స్క్రీన్ కనిపించకుండా చేసే సెక్యూరిటీ ఇందులో ఉంటుంది. దీనివల్ల పబ్లిక్ ప్లేస్‌లలో ఫోన్ వాడుతున్నప్పుడు ఇతరులు మన స్క్రీన్‌పై ఏం జరుగుతుందో చూడలేరు. కేవలం అల్ట్రా మోడల్‌కే పరిమితం కాకుండా ఈ సెక్యూరిటీ ఫీచర్‌ను మిగిలిన మోడల్స్‌లోకి తీసుకురావడం గొప్ప విషయమే.

ఇక ప్రస్తుతం మార్కెట్లో దుమ్మురేపుతున్న గెలాక్సీ ఎస్26 అల్ట్రా గురించి మాట్లాడుకుంటే ఇది ఫిబ్రవరి 25న ఇండియాలో లాంచ్ అయింది. 12జీబీ ర్యామ్, 256జీబీ స్టోరేజ్ ఉన్న బేస్ వేరియంట్ ధర సుమారు రూ. 1,39,999 గా ఉంది. ఈ ఫోన్ 6.9 అంగుళాల డైనమిక్ అమోలెడ్ 2ఎక్స్ డిస్ప్లేతో వస్తుంది. ఇది 120హెర్ట్జ్ రిఫ్రెష్ రేట్‌ను సపోర్ట్ చేస్తూ అదిరిపోయే విజువల్ ఎక్స్‌పీరియన్స్ ఇస్తుంది. గెలాక్సీ కోసమే ప్రత్యేకంగా తయారు చేసిన స్నాప్‌డ్రాగన్ 8 ఎలైట్ జెన్ 5 చిప్‌సెట్‌తో పాటు 5,000ఎంఏహెచ్ బ్యాటరీని ఈ ఫోన్ కలిగి ఉండటం వల్ల గేమింగ్, మల్టీ టాస్కింగ్‌లో దీనికి సాటి లేదు.

మొత్తానికి శాంసంగ్ తన గెలాక్సీ ఎస్27 సిరీస్ ద్వారా స్మార్ట్‌ఫోన్ మార్కెట్ను ఒక ఊపు ఊపాలని చూస్తోంది. ప్లస్ , అల్ట్రా మోడల్స్ మధ్య ఉన్న గ్యాప్‌ను భర్తీ చేయడానికి ప్రో మోడల్‌ను తీసుకురావడం ఒక స్మార్ట్ మూవ్ అని చెప్పవచ్చు. ఐఫోన్ ప్రో మోడల్స్‌కు గట్టి పోటీ ఇచ్చే ఉద్దేశంతోనే శాంసంగ్ ఈ దిశగా అడుగులు వేస్తోంది. ప్రైవసీకి పెద్దపీట వేస్తూ డిస్ప్లే టెక్నాలజీలో మార్పులు చేయడం ద్వారా యూజర్ల మనసు గెలుచుకోవాలని చూస్తోంది. వచ్చే ఏడాది మొదట్లో జరగబోయే గెలాక్సీ అన్‌ప్యాక్డ్ ఈవెంట్‌లో ఈ ప్రో మోడల్ గురించి మరిన్ని అధికారిక వివరాలు తెలిసే అవకాశం ఉంది. అప్పటివరకు ఈ కొత్త ఫోన్ కోసం టెక్ ప్రియులు వెయిట్ చేయాల్సిందే.