Sony Layoffs : గేమర్లకు బ్యాడ్ న్యూస్.. ప్రసిద్ధ బంగీ స్టూడియోలో భారీగా ఉద్యోగులను తీసేసిన సోనీ

Sony Layoffs : గేమింగ్ ప్రపంచంలో అత్యంత ప్రజాదరణ పొందిన డెస్టినీ 2 గేమ్ తయారీ సంస్థ  బంగీ(Bungie) స్టూడియోలో లేఆఫ్స్ కలకలం సృష్టిస్తున్నాయి. గత కొన్ని వారాలుగా ఊహాగానాలు వినిపిస్తున్నట్లే, మాతృ సంస్థ సోనీ ఈ స్టూడియోలో భారీగా కోతలు విధిస్తున్నట్లు అధికారికంగా ప్రకటించింది. డెస్టినీ 2 గేమ్‌కు సంబంధించిన చివరి కంటెంట్ అప్‌డేట్ విడుదలైన కొద్ది రోజులకే ఈ నిర్ణయం రావడం గమనార్హం. ఈ లేఆఫ్స్ వల్ల స్టూడియోలోని మెజారిటీ డెస్టినీ టీమ్ సభ్యులతో పాటు మారథాన్ గేమ్ టీమ్‌కు చెందిన కొందరు ఉద్యోగులు కూడా రోడ్డున పడ్డారు. అయితే ఎంతమంది ఉద్యోగులపై ఈ ప్రభావం పడిందనే ఖచ్చితమైన సంఖ్యను మాత్రం సోనీ బయటపెట్టలేదు. తమ భవిష్యత్తు ప్రాజెక్టులు ఇంకా ప్రారంభ దశలోనే ఉన్నాయని, అందుకే స్టూడియో పరిమాణాన్ని తగ్గించక తప్పలేదని బంగీ యాజమాన్యం వెల్లడించింది.

నిజానికి బంగీ డెవలప్‌మెంట్ టీమ్స్ గత కొంతకాలంగా డెస్టినీ 2, మారథాన్ అనే రెండు ప్రధాన ప్రాజెక్టులపై వర్క్ చేస్తున్నాయి. దాదాపు పదేళ్ల పాటు ప్రపంచవ్యాప్తంగా కోట్లాది మందిని అలరించిన డెస్టినీ 2 గేమింగ్ ప్రయాణాన్ని ముగిస్తున్నట్లు ఈ ఏడాది మే నెలలోనే స్టూడియో ప్రకటించింది. ఈ క్రమంలోనే ఈ నెల ప్రారంభంలో విడుదల చేసిన చివరి అప్‌డేట్ మాన్యుమెంట్ ఆఫ్ ట్రయంఫ్‎ను ఆడేందుకు గేమర్స్ ఎగబడ్డారు. తమకు ఎంతో ఇష్టమైన గేమ్‌కు కన్నీటి వీడ్కోలు పలికారు. అయితే, ఈ ఆఖరి క్రేజ్ కంపెనీ అంతర్గత నిర్ణయాలను మార్చలేకపోయింది. గత కొన్ని సంవత్సరాలుగా డెస్టినీ 2 ఆశించిన స్థాయిలో రాణించలేకపోయిందని, అంచనాలను అందుకోవడంలో విఫలమైందని బంగీ స్వయంగా ఒప్పుకుంది. ఈ క్రమంలోనే పాత ప్రాజెక్ట్ ముగిసిపోవడం, కొత్త ప్రాజెక్టులు ఇంకా ఐడియా దశలోనే ఉండటంతో ఇంత పెద్ద టీమ్‌ను మెయింటైన్ చేయడం ఆర్థికంగా భారం అయిందని కంపెనీ తెలిపింది.

సోనీ ఇంటరాక్టివ్ ఎంటర్‌టైన్‌మెంట్ (SIE) సిబ్బందికి పంపిన అంతర్గత ఈమెయిల్‌లో ప్లేస్టేషన్ స్టూడియోస్ హెడ్  హెర్మెన్ హుల్స్ట్ ఈ లేఆఫ్స్ వార్తను ధృవీకరించారు. బంగీ స్టూడియోతో పాటు వారికి సపోర్ట్ ఇచ్చే ఎస్ఐఈ బ్యాక్‌ఎండ్ టీమ్స్‌లో కూడా చాలా మంది ఉద్యోగులను తొలగిస్తున్నట్లు ఆయన పేర్కొన్నారు. ఈ నిర్ణయం తీసుకోవడం చాలా కష్టంగా, బాధాకరంగా అనిపించినప్పటికీ, బంగీ లీడర్‌షిప్‌తో కలిసి సుదీర్ఘంగా చర్చించిన తర్వాతే ఈ ముగింపు పలికామన్నారు. స్టూడియో దీర్ఘకాలిక లక్ష్యాలు, వనరుల లభ్యత, భవిష్యత్తు ప్రాజెక్టుల ప్రాధాన్యతలను దృష్టిలో ఉంచుకుని, వేరే ప్రత్యామ్నాయం లేకే ఈ కఠిన నిర్ణయానికి రావాల్సి వచ్చిందని ఆయన వివరించారు. దశాబ్ద కాలంగా డెస్టినీ ఫ్రాంచైజీ గేమింగ్ ఇండస్ట్రీలో సృష్టించిన ఇంపాక్ట్ అద్భుతమని, అందుకోసం పనిచేసిన ప్రతి ఒక్కరూ గర్వపడాలని ఆయన కొనియాడారు.

OnePlus : బడ్జెట్ ఫోన్లలోనూ 185Hz డిస్‌ప్లే టెక్నాలజీ.. సరికొత్త ప్లాన్‌తో వస్తున్న వన్‌ప్లస్

గడిచిన కొన్నేళ్లుగా బంగీ స్టూడియో తీవ్రమైన ఒడిదొడుకులను ఎదుర్కొంటోంది. 2022 సంవత్సరంలో సోనీ కంపెనీ ఈ స్టూడియోను ఏకంగా 3.6 బిలియన్ డాలర్లకు (సుమారు రూ.30,000 కోట్లకు పైగా) భారీ ధర పెట్టి కొనుగోలు చేసింది. అయితే సోనీ చేతిలోకి వెళ్లిన తర్వాత డెస్టినీ 2 అప్‌డేట్స్ ప్లేయర్లను పెద్దగా ఆకట్టుకోలేకపోయాయి. దీనివల్ల ఇప్పటికే పలుమార్లు ఉద్యోగుల తొలగింపులు జరిగాయి. దానికి తోడు కంపెనీ ఎంతో ఆశలు పెట్టుకున్న మారథాన్ అనే కొత్త యాక్షన్ షూటర్ గేమ్‌కు కూడా ఆశించిన స్థాయిలో రెస్పాన్స్ రాలేదు. గతేడాది క్లోజ్డ్ ఆల్ఫా టెస్టింగ్‌లో నెగటివ్ ఫీడ్‌బ్యాక్ రావడంతో ఈ గేమ్‌ను ఆలస్యంగా ఈ ఏడాది మార్చి 2026లో లాంచ్ చేశారు. క్రిటిక్స్ నుంచి ప్రశంసలు దక్కినప్పటికీ, డెస్టినీ 2 లాగా పెద్ద ఎత్తున ప్లేయర్ బేస్‌ను ఇది సంపాదించలేకపోయింది. ఈ దెబ్బతో రెండు దశాబ్దాలుగా కంపెనీ సీఈఓగా ఉన్న పీట్ పార్సన్స్ కూడా గత ఏడాదే తన పదవి నుంచి తప్పుకున్నారు. ప్రస్తుతానికి మారథాన్‌కు సీజనల్ అప్‌డేట్స్ ఇస్తూనే, భవిష్యత్తును రీస్ట్రక్చర్ చేసుకునే పనిలో బంగీ పడింది.