FIFA World Cup 2026 : భారత్‌లో ‘ఫిఫా వరల్డ్ కప్ 2026’ హంగామా.. ఉచితంగా చూసే ఛాన్స్ ఎక్కడంటే?

FIFA World Cup 2026 : ప్రపంచవ్యాప్తంగా ఫుట్‌బాల్ ఆటపై ఉన్న క్రేజ్ గురించి ప్రత్యేకంగా చెప్పాల్సిన అవసరం లేదు. ప్రస్తుతం ప్రపంచవ్యాప్తంగా ఉన్న క్రీడాభిమానులందరి కళ్లు ఫిఫా వరల్డ్ కప్ 2026 పైనే ఉన్నాయి. జూన్ 12 నుంచి ప్రారంభమైన ఈ మెగా టోర్నమెంట్‌ను మూడు పెద్ద దేశాలైన అమెరికా, కెనడా , మెక్సికోలు ఉమ్మడిగా నిర్వహిస్తున్నాయి. ఈసారి టోర్నమెంట్ పరిధిని భారీగా పెంచారు. చరిత్రలో మొదటిసారిగా ఏకంగా 48 దేశాలు ఈ ప్రతిష్టాత్మక కప్‌ కోసం పోటీ పడుతున్నాయి. మూడు దేశాలలోని 15 అధునాతన స్టేడియంలలో మొత్తం 104 హై-వోల్టేజ్ మ్యాచ్‌లు జరగనున్నాయి.

భారత్‌లోనూ సాకర్ క్రేజ్.. కానీ టీమిండియా ఎక్కడ?
మధ్య ప్రాచ్యంలో నడుస్తున్న రాజకీయ సంక్షోభాల నీడ ఈ మెగా టోర్నీపై కొంతవరకు పడినప్పటికీ, క్రీడాభిమానుల ఉత్సాహం మాత్రం అణుమాత్రం కూడా తగ్గలేదు. మన భారతదేశంలో కూడా ఫుట్‌బాల్ వరల్డ్ కప్‌కు విపరీతమైన ఆదరణ ఉంది. అయితే, జనాభా పరంగా ప్రపంచంలోనే అతిపెద్ద శక్తులలో ఒకటిగా ఉన్న మన భారతదేశ ఫుట్‌బాల్ జట్టుకు.. ఈ మెగా టోర్నమెంట్‌లో ఎంట్రీ దక్కడం అనేది ప్రస్తుతానికి చాలా దూరపు ముచ్చటగానే మిగిలిపోయింది. అయినప్పటికీ మెస్సి, రొనాల్డో, నెయ్మార్ వంటి అంతర్జాతీయ స్టార్ ఆటగాళ్ల ఆటను చూడటానికి భారతీయ ఫ్యాన్స్ సిద్ధమయ్యారు.

భారత్‌లో టీవీ లైవ్ టెలికాస్ట్ వివరాలు
భారతదేశంలో ఉన్న ఫుట్‌బాల్ అభిమానుల కోసం ప్రముఖ టెలివిజన్ నెట్‌వర్క్ జీ ఒక సూపర్ గుడ్ న్యూస్ చెప్పింది. ఈ ఏడాది ఫిఫా వరల్డ్ కప్ అధికారిక బ్రాడ్‌కాస్టింగ్ హక్కులను జీ గ్రూప్ సొంతం చేసుకుంది. కేవలం వరల్డ్ కప్ మాత్రమే కాకుండా, రాబోయే రోజుల్లో జరిగే మరో 39 అంతర్జాతీయ ఫుట్‌బాల్ ఈవెంట్ల ప్రత్యక్ష ప్రసారం కోసం జీ సంస్థ ఫిఫాతో ప్రత్యేక ఒప్పందం కుదుర్చుకుంది. భారత్‌లోని బుల్లితెర వీక్షకులు ఈ మ్యాచ్‌లను యునైట్8 స్పోర్ట్స్ టెలివిజన్ ఛానళ్లలో ప్రత్యక్షంగా వీక్షించవచ్చు.

ఉచితంగా చూసే సువర్ణావకాశం
ప్రభుత్వ అధికారిక ఛానల్ అయిన డీడీ స్పోర్ట్స్ లో కూడా సాధారణ కస్టమర్ల కోసం ఉచిత ప్రసారాలను అందుబాటులోకి తెచ్చారు. జూన్ 12న మెక్సికో, సౌతాఫ్రికా దేశాల మధ్య జరిగిన ఈ టోర్నమెంట్ మొదటి మ్యాచ్‌తో పాటు.. టోర్నీలో అత్యంత కీలకమైన క్వార్టర్ ఫైనల్స్, సెమీ ఫైనల్స్,  జూలై 20న జరిగే గ్రాండ్ ఫైనల్ మ్యాచ్‌లను డీడీ స్పోర్ట్స్ ఛానల్ ద్వారా ఉచితంగా వీక్షించే సదుపాయాన్ని కల్పించారు. దీనివల్ల ఎలాంటి కేబుల్ కనెక్షన్ లేని వారు కూడా ఉచితంగా సాకర్ పండగను ఆస్వాదించవచ్చు.

OnePlus N6 : భారత్‌లోకి వన్‌ప్లస్ సరికొత్త బడ్జెట్ ఫోన్.. వన్‌ప్లస్ N6 లాంచ్ అప్‌డేట్

మొబైల్‌లో లైవ్ స్ట్రీమింగ్ ఎలా చూడాలి?
మీరు ఒకవేళ ప్రయాణంలో ఉంటూ మొబైల్ లేదా లాప్‌టాప్‌లో మ్యాచ్‌లు చూడాలనుకుంటే..  జీ5 యాప్, వెబ్‌సైట్ ద్వారా లైవ్ స్ట్రీమింగ్  చూడవచ్చు. ఫిఫా వరల్డ్ కప్ వీక్షకుల కోసం జీ5 సంస్థ ప్రత్యేకమైన సబ్‌స్క్రిప్షన్ ప్లాన్‌లను ప్రవేశపెట్టింది. ఈ ప్లాన్‌లను కొనుగోలు చేయడం ద్వారా కేవలం ఫిఫా వరల్డ్ కప్ మ్యాచ్‌లు మాత్రమే కాకుండా.. భవిష్యత్తులో జీ5 లో ప్రసారమయ్యే అనేక ఇతర అంతర్జాతీయ ఫుట్‌బాల్ టోర్నమెంట్‌లను కూడా ఉచితంగా యాక్సెస్ చేసుకునే అవకాశాన్ని కల్పించారు.

మ్యాచ్‌ల షెడ్యూల్, వేదికల వివరాలు
ఈ ఏడాది జరిగే మొత్తం 104 మ్యాచ్‌లలో సింహభాగం మ్యాచ్‌లు అమెరికాలోనే జరగనున్నాయి. అమెరికా గడ్డపై ఏకంగా 78 మ్యాచ్‌లు జరగనుండగా.. మిగిలిన మ్యాచ్‌లను కెనడా, మెక్సికో దేశాలలో నిర్వహిస్తున్నారు. భారత కాలమానం ప్రకారం జూన్ 11 అర్ధరాత్రి దాటిన తర్వాత (జూన్ 12 తెల్లవారుజామున) 12:30 గంటలకు మెక్సికో, సౌతాఫ్రికాల మధ్య తొలి మ్యాచ్‌తో ఈ టోర్నీ గ్రాండ్‌గా ప్రారంభమైంది. ఇక లీగ్ మ్యాచ్‌ల అనంతరం జూలై 15, 16 తేదీలలో సెమీఫైనల్ మ్యాచ్‌లు జరగనుండగా.. ప్రపంచ ఫుట్‌బాల్ విజేత ఎవరో తేల్చే మోస్ట్ అవైటెడ్ ఫైనల్ మ్యాచ్ జూలై 20న అత్యంత వైభవంగా జరగనుంది.