VPN Safety : నెట్‌లో ప్రైవసీ కావాలా బాస్? ఆండ్రాయిడ్‌లో ఈ చిన్న VPN ట్రిక్ వాడేయండి

VPN Safety : ఇంటర్నెట్ వినియోగించే ప్రతి ఒక్కరికీ సైబర్ సెక్యూరిటీ, పర్సనల్ ప్రైవసీ అత్యంత కీలకమైన అంశాలు. నేటి కాలంలో చాలామంది బస్టాండ్లు, రైల్వే స్టేషన్లు లేదా కేఫ్‌లలో దొరికే ఉచిత పబ్లిక్ వైఫైలను ఉపయోగిస్తుంటారు. అలాగే కొన్ని ప్రాంతాలకే పరిమితమైన (జియో-బ్లాక్ అయిన) వెబ్‌సైట్లను సేకరించాలని అనుకుంటారు. అలాంటి సమయంలో డిజిటల్ భద్రత కోసం విపిఎన్ (Virtual Private Network) ఒక అద్భుతమైన రక్షణ కవచంలా పనిచేస్తుంది. ఆండ్రాయిడ్ స్మార్ట్‌ఫోన్లలో VPN సర్వీస్‌ను ఎలా సెట్ చేసుకోవాలి, దాన్ని మాన్యువల్‌గా ఎలా యాడ్ చేయాలి, మరియు ఎల్లప్పుడూ ఆన్‌లో ఉండేలా ఆల్వేస్ ఆన్ VPN ఫీచర్‌ను ఎలా ఆన్ చేయాలో ఇక్కడ వివరంగా తెలుసుకుందాం.

విపిఎన్ అంటే ఏమిటి? ఇది ఎలా పనిచేస్తుంది?
విపిఎన్ అనేది మీ ఆండ్రాయిడ్ ఫోన్, ఇంటర్నెట్ సర్వీస్ ప్రొవైడర్  సర్వర్ల మధ్య ఒక సురక్షితమైన, ఎన్‌క్రిప్టెడ్ నెట్‌వర్క్ కనెక్షన్‌ను ఏర్పాటు చేస్తుంది. మీరు ఇంటర్నెట్‌లో పంపే లేదా స్వీకరించే ప్రతీ డేటా నేరుగా సాధారణ సర్వర్‌కు వెళ్లకుండా, ఈ సెక్యూర్ ఎన్‌క్రిప్షన్ టన్నెల్ ద్వారా ప్రయాణిస్తుంది. దీనివల్ల పబ్లిక్ వైఫైలు ఉపయోగించినప్పుడు హ్యాకర్లు మీ బ్యాంకింగ్ వివరాలు, పాస్‌వర్డ్‌లు లేదా పర్సనల్ సమాచారాన్ని దొంగిలించలేరు. అంతేకాకుండా మీ అసలైన IP అడ్రస్ దాగి ఉండటం వల్ల మీ ఆన్‌లైన్ ప్రైవసీకి పూర్తి భద్రత లభిస్తుంది.

ఆండ్రాయిడ్ ఫోన్‌లో VPN నెట్‌వర్క్‌ను మాన్యువల్‌గా ఎలా యాడ్ చేయాలి?
ఏదైనా విశ్వసనీయ VPN సర్వీస్ ప్రొవైడర్ (ఉదాహరణకు ExpressVPN, NordVPN లేదా ProtonVPN) నుంచి సర్వర్ వివరాలు, లాగిన్ క్రెడెన్షియల్స్ పొందిన తర్వాత మీ ఫోన్‌లో మాన్యువల్‌గా కాన్ఫిగర్ చేసుకోవచ్చు. దీనికోసం ముందుగా మీ ఆండ్రాయిడ్ మొబైల్‌లోని సెట్టింగ్స్ యాప్‌ను ఓపెన్ చేసి, నెట్‌వర్క్ & ఇంటర్నెట్ లేదా కనెక్షన్స్  ఆప్షన్ పై టాప్ చేయాలి.

ఆ తర్వాత కిందకి స్క్రోల్ చేసి VPN ఆప్షన్‌ను ఎంచుకోవాలి (ఒకవేళ ఈ ఆప్షన్ దొరక్కపోతే పైన సెర్చ్ బార్‌లో 'VPN' అని టైప్ చేయవచ్చు). స్క్రీన్ పైభాగంలో కుడివైపున ఉండే '+' (Add) గుర్తుపై క్లిక్ చేసి, మీ VPN ప్రొవైడర్ ఇచ్చిన వివరాలు (VPN పేరు, ప్రొటోకాల్ టైప్, సర్వర్ అడ్రస్, యూజర్ నేమ్, పాస్‌వర్డ్) సరిగ్గా నమోదు చేయాలి. వివరాలన్నీ సరిచూసుకున్నాక సేవ్ (Save) బటన్ పై క్లిక్ చేస్తే VPN ప్రొఫైల్ క్రియేట్ అవుతుంది.

 ఆండ్రాయిడ్‌లో సేవ్ చేసిన VPNకి ఎలా కనెక్ట్ అవ్వాలి?
VPN నెట్‌వర్క్‌ను సేవ్ చేసిన తర్వాత దానికి కనెక్ట్ అవ్వడం చాలా సులభం. మీ ఫోన్ సెట్టింగ్స్ > నెట్‌వర్క్ & ఇంటర్నెట్ > VPN విభాగంలోకి వెళ్తే, మీరు ముందే క్రియేట్ చేసుకున్న VPN నెట్‌వర్క్ పేరు అక్కడ కనిపిస్తుంది. ఆ పేరుపై క్లిక్ చేసి, అవసరమైతే మీ యూజర్‌నేమ్, పాస్‌వర్డ్ నమోదు చేసి 'కనెక్ట్' పై టాప్ చేయాలి. కనెక్షన్ విజయవంతం కాగానే మీ ఫోన్ టాప్ స్టేటస్ బార్‌లో ఒక Key గుర్తు లేదా VPN ఐకాన్ ప్రత్యక్షమవుతుంది. ఇది మీ ఇంటర్నెట్ ట్రాఫిక్ సురక్షితంగా ఎన్‌క్రిప్ట్ అయిందని తెలియజేస్తుంది.

Xiaomi Power Bank : ఒకేసారి 3 డివైజ్లు ఛార్జ్ చేసుకోవచ్చు.. షావోమి నుంచి 67W పవర్ బ్యాంక్ లాంచ్

 'ఆల్వేస్ ఆన్ VPN' ఎలా ఆన్ చేయాలి?
పబ్లిక్ వైఫై లేదా బలహీనమైన నెట్‌వర్క్‌లో ఉన్నప్పుడు VPN కనెక్షన్ అకస్మాత్తుగా డిస్‌కనెక్ట్ అయితే మీ వ్యక్తిగత డేటా బయటకు లీక్ అయ్యే ప్రమాదం ఉంది. అలా జరగకుండా VPN సర్వీస్ మీ ఫోన్ ఉన్నంతసేపూ ఎల్లప్పుడూ ఆన్‌లో ఉండేలా ఆండ్రాయిడ్‌లో ప్రత్యేక ఫీచర్ ఉంది.

దీనికోసం సెట్టింగ్స్ > నెట్‌వర్క్ & ఇంటర్నెట్ > VPN లోకి వెళ్లాలి. మీరు కనెక్ట్ చేసిన VPN నెట్‌వర్క్ పేరు పక్కన ఉన్న సెట్టింగ్స్ ఐకాన్ పై క్లిక్ చేసి, అక్కడ ఉండే  ఆల్వేస్ ఆన్ VPN ఆప్షన్‌ను టోగుల్ చేసి ఆన్ చేయాలి. మరింత గరిష్ట రక్షణ కోసం దాని కింద ఉండే బ్లాక్ కనెక్షన్స్ వితౌట్ VPN అనే కిల్-స్విచ్ ఆప్షన్‌ను కూడా ఆన్ చేసుకుంటే, VPN డిస్‌కనెక్ట్ అయినప్పుడు ఇంటర్నెట్ ట్రాఫిక్ పూర్తిగా ఆగిపోయి మీ డేటా సురక్షితంగా ఉంటుంది. చివరిగా సేవ్ క్లిక్ చేస్తే మీ ఆండ్రాయిడ్ సెక్యూరిటీ సెటప్ పూర్తవుతుంది.