IRCTC Website : రైల్వే ప్రయాణికులకు సూపర్ గుడ్ న్యూస్.. జులై 15న సరికొత్త IRCTC వెబ్‌సైట్ లాంచ్

IRCTC Website : భారతీయ రైల్వేలో ప్రయాణించే కోట్లాది మంది ప్రయాణికులకు కేంద్ర ప్రభుత్వం ఒక అద్భుతమైన తీపి కబురు అందించింది. ఐఆర్‌సీటీసీ  అధికారిక వెబ్‌సైట్ ద్వారా ఆన్‌లైన్ లో రైలు టికెట్లు బుక్ చేసుకునేటప్పుడు ఎదురవుతున్న సాంకేతిక ఇబ్బందులపై చాలా కాలంగా ప్రయాణికుల నుంచి ఫిర్యాదులు వస్తున్నాయి. ముఖ్యంగా అత్యంత డిమాండ్ ఉండే  తత్కాల్ టికెట్ల బుకింగ్ సమయంలో సర్వర్లు స్లో అవ్వడం, ఓటీపీలు రాకపోవడం, క్యాప్చా కోడ్ ఎంటర్ చేసేటప్పుడు వచ్చే సమస్యలపై యూజర్లు తీవ్ర అసంతృప్తి వ్యక్తం చేస్తున్నారు. ఈ సమస్యలన్నింటికీ శాశ్వత పరిష్కారం చూపిస్తూ.. త్వరలోనే సరికొత్త ఐఆర్‌సీటీసీ వెబ్‌సైట్‌ను లాంచ్ చేయబోతున్నట్లు కేంద్ర రైల్వే మంత్రి అశ్విని వైష్ణవ్ కీలక సంకేతాలు ఇచ్చారు.

స్టూడెంట్ అడిగిన వెంటనే రైల్వే మంత్రి లైవ్ యాక్షన్
జైపూర్‌లోని ప్రతిష్టాత్మక మాళవియా నేషనల్ ఇన్‌స్టిట్యూట్ ఆఫ్ టెక్నాలజీ (MNIT)లో విద్యార్థులతో నిర్వహించిన ముఖాముఖి కార్యక్రమంలో రైల్వే మంత్రి ఈ కీలక ప్రకటన చేశారు. ఈ సమావేశానికి సంబంధించిన ఒక ఆసక్తికరమైన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. అందులో ఒక విద్యార్థి మైక్ తీసుకుని ఐఆర్‌సీటీసీ వెబ్‌సైట్‌లో తత్కాల్ బుకింగ్ సమయంలో వచ్చే క్యాప్చా సమస్యల వల్ల సామాన్యులు ఎంతలా ఇబ్బంది పడుతున్నారో నేరుగా మంత్రి దృష్టికి తీసుకువెళ్లాడు. విద్యార్థి అడిగిన ప్రశ్నకు సానుకూలంగా స్పందించిన అశ్విని వైష్ణవ్.. ఏమాత్రం ఆలస్యం చేయకుండా స్టేజీ పైనే ఉన్నపళంగా ఉన్నతాధికారికి ఫోన్ చేసి కొత్త వెబ్‌సైట్ పురోగతిపై వివరాలు అడిగి తెలుసుకున్నారు.

జులై 15 నాటికి కొత్త ప్లాట్‌ఫారమ్ సిద్ధం
అధికారితో ఫోన్ సంభాషణ ముగిసిన వెంటనే రైల్వే మంత్రి అక్కడ ఉన్న విద్యార్థులకు, ప్రయాణికులకు ఒక శుభవార్త చెప్పారు. కొత్త ఐఆర్‌సీటీసీ వెబ్‌సైట్ పనులు దాదాపు చివరి దశకు చేరుకున్నాయని, రాబోయే జులై 15 నాటికి ఈ సరికొత్త ప్లాట్‌ఫారమ్‌ను సాధారణ ప్రజల వినియోగం కోసం అందుబాటులోకి తీసుకువస్తామని ప్రకటించారు. మంత్రి నోట ఈ అఫీషియల్ అప్‌డేట్ వినగానే హాల్ లో ఉన్న విద్యార్థులందరూ చప్పట్లతో, ఆనందంతో హర్షధ్వానాలు వ్యక్తం చేస్తూ మంత్రికి కృతజ్ఞతలు తెలిపారు. కొత్త వెబ్‌సైట్ రాకతో రాబోయే రోజుల్లో టికెట్ బుకింగ్ ప్రక్రియ చాలా సులభతరం కానుంది.

Xiaomi Mi 10T 5G : ఫ్లిప్‌కార్ట్‌లో షియోమి Mi 10T 5G పై బంపర్ ఆఫర్.. ఏకంగా రూ.11,300 డిస్కౌంట్

ఆన్‌లైన్ బుకింగ్‌పై పెరిగిన డిపెండెన్సీ
ప్రస్తుత కాలంలో రైల్వే స్టేషన్లలోని రిజర్వేషన్ కౌంటర్లకు వెళ్లి టికెట్లు కొనే వారి సంఖ్య విపరీతంగా తగ్గిపోయింది. రైల్వే అధికారుల అధికారిక లెక్కల ప్రకారం.. దేశంలో ప్రస్తుతం బుక్ అవుతున్న మొత్తం రైలు టికెట్లలో దాదాపు 88 శాతం టికెట్లు కేవలం ఆన్‌లైన్ ఐఆర్‌సీటీసీ యాప్, వెబ్‌సైట్ ద్వారానే బుక్ అవుతున్నాయి. చాలా తక్కువ శాతం మంది మాత్రమే స్టేషన్ కౌంటర్లను ఆశ్రయిస్తున్నారు. ఈ భారీ మార్పుల కారణంగానే పీక్ అవర్స్ లో, ముఖ్యంగా ఉదయం 10, 11 గంటల తత్కాల్ సమయంలో లక్షలాది మంది ఒకేసారి వెబ్‌సైట్‌ను ఓపెన్ చేయడం వల్ల సర్వర్లు క్రాష్ అవుతున్నాయి. దీనిని అధిగమించడానికి రైల్వే శాఖ ఐటీ విభాగం అధునాతన సర్వర్లను రంగంలోకి దించుతోంది.

భద్రత, సులభతర ప్రయాణమే లక్ష్యం
ఆన్‌లైన్ టికెట్ బుకింగ్ వ్యవస్థను మరింత పారదర్శకంగా మార్చేందుకు రైల్వే శాఖ గతంలో కొన్ని కీలక నిర్ణయాలు తీసుకుంది. ఇందులో భాగంగా తత్కాల్ టికెట్ బుకింగ్ దుర్వినియోగాన్ని అడ్డుకోవడానికి అధికారిక వెరిఫికేషన్ నిబంధనలను కూడా కఠినతరం చేశారు. భద్రతా చర్యల్లో భాగంగా సుమారు 3.04 కోట్ల ఐఆర్‌సీటీసీ యూజర్ అకౌంట్లను పూర్తిగా డియాక్టివేట్ చేయగా, మరో 2.94 కోట్ల అకౌంట్లను తాత్కాలికంగా సస్పెండ్ చేశారు. ఇప్పుడు రాబోయే సరికొత్త వెబ్‌సైట్‌లో కేవలం ట్రాఫిక్ సామర్థ్యాన్ని పెంచడమే కాకుండా.. ఎలాంటి హ్యాకింగ్స్ లేదా ఫేక్ బుకింగ్స్ జరగకుండా అల్ట్రా మోడరన్ సెక్యూరిటీ ఫీచర్లను కూడా జోడించబోతున్నట్లు సమాచారం.