YouTube : యూట్యూబర్లకు గుడ్ న్యూస్.. మీ ఫేస్‌తో డీప్‌ఫేక్ వీడియోలు చేస్తే ఇక దొరికేట్లే

YouTube : సోషల్ మీడియా ప్రపంచాన్ని ప్రస్తుతం భయపెడుతున్న అతిపెద్ద భూతం డీప్‌ఫేక్. ప్రముఖ సెలబ్రిటీలు, కంటెంట్ క్రియేటర్ల ముఖాలను ఆర్టిఫిషియల్ ఇంటెలిజెన్స్ సాయంతో మార్చేసి, అసభ్యకరంగా లేదా తప్పుదోవ పట్టించేలా వీడియోలు సృష్టించడం ఈ మధ్య బాగా ఎక్కువైపోయింది. ఈ సమస్యకు శాశ్వతంగా చెక్ పెట్టేందుకు ప్రముఖ వీడియో స్ట్రీమింగ్ దిగ్గజం యూట్యూబ్ ఒక బ్రహ్మాస్త్రాన్ని సిద్ధం చేసింది. 2024 లో మొదటిసారి ప్రకటించిన తమ మోస్ట్ అద్భుతమైన ఏఐ టూల్ లైక్‌నెస్ డిటెక్షన్‎ను ఇప్పుడు ప్రపంచవ్యాప్తంగా ఉన్న అర్హులైన అడల్ట్ క్రియేటర్లందరికీ అందుబాటులోకి తెచ్చేందుకు గ్రీన్ సిగ్నల్ ఇచ్చింది. రాబోయే కొన్ని వారాల్లోనే ఈ ఫీచర్ అందరి మొబైల్స్, డెస్క్‌టాప్‌లలో ప్రత్యక్షం కానుంది.

ఎవరు పడితే వాళ్లు మీ మొహం వాడలేరు 
నిజానికి ఈ టూల్‌ను యూట్యూబ్ గత ఏడాది కొంతమంది సెలెక్టెడ్ క్రియేటర్లతో కలిసి టెస్ట్ చేసింది. ఆ తర్వాత ఈ ఏడాది మార్చి నెలలో కేవలం ప్రభుత్వ అధికారులు, జర్నలిస్టులకు మాత్రమే డీప్‌ఫేక్స్‌ను గుర్తించేందుకు ఈ యాక్సెస్‌ను ఇచ్చింది. అయితే, రోజురోజుకూ పెరిగిపోతున్న ఏఐ మోసాలను అడ్డుకోవడానికి, యూట్యూబ్ పార్ట్నర్ ప్రోగ్రామ్లో ఉంటూ.. 18 ఏళ్లు నిండిన క్రియేటర్లందరికీ ఈ డిటెక్షన్ టూల్ ఇవ్వాలని గూగుల్ నిర్ణయించింది. ఈ టూల్ బ్యాక్‌గ్రౌండ్‌లో నిరంతరం రన్ అవుతూ.. మీ ముఖ పోలికలతో ఎవరైనా ఆర్టిఫిషియల్ ఇంటెలిజెన్స్ ద్వారా నకిలీ వీడియోలు తయారు చేసి యూట్యూబ్‌లో అప్‌లోడ్ చేస్తే వెంటనే పసిగట్టి మీకు అలర్ట్ పంపుతుంది.

యూట్యూబ్ స్టూడియోలో ఈ ఆప్షన్‌ను ఎలా ఆన్ చేసుకోవాలి?
ఈ ఫీచర్ మీ ఛానెల్‌కు రోల్ అవుట్ అయిన తర్వాత, డెస్క్‌టాప్‌లో యూట్యూబ్ స్టూడియో ఓపెన్ చేసి చాలా సులభంగా ఆక్టివేట్ చేసుకోవచ్చు:
* మొదట యూట్యూబ్ స్టూడియో డాష్‌బోర్డ్‌లోకి వెళ్లండి.
* ఎడమ వైపు ఉన్న మెనూ బార్‌లో కంటెంట్ డిటెక్షన్ అనే ఆప్షన్ కనిపిస్తుంది, దానిపై క్లిక్ చేయండి.
* అందులో లైక్‌నెస్ అనే మెనూని ఎంచుకుని, స్టార్ట్ నౌ బటన్ నొక్కాలి.
* ఆ తర్వాత మీ ముఖ పోలికలను గుర్తించడానికి యూట్యూబ్‌కు పర్మిషన్ ఇస్తూ.. వన్-టైమ్ వెరిఫికేషన్ (ఫేషియల్ ఫీచర్స్ గుర్తింపు) ప్రాసెస్ పూర్తి చేయాల్సి ఉంటుంది.
* ఈ సెటప్ పూర్తయిన తర్వాత, ఎవరైనా మీ డీప్‌ఫేక్ వీడియోను అప్‌లోడ్ చేస్తే అది నేరుగా మీకు చూపిస్తుంది. ఒకవేళ ఆ పేజీ ఖాళీగా ఉంటే, మీ ముఖంతో ఎలాంటి నకిలీ వీడియోలు మార్కెట్లో లేవని అర్థం.

వాయిస్ క్లోనింగ్‌కు ఇది పని చేయదు 
యూట్యూబ్ తీసుకొచ్చిన ఈ టూల్ ఇండస్ట్రీలోనే అత్యంత అరుదైన సాంకేతికత అయినప్పటికీ, దీనికి ఒక చిన్న లిమిటేషన్ కూడా ఉంది. ఈ లైక్‌నెస్ డిటెక్షన్ టూల్ కేవలం మీ ముఖం, కళ్లు, శారీరక పోలికలను మాత్రమే స్కాన్ చేసి గుర్తుపట్టగలదు. ఒకవేళ ఎవరైనా మీ వాయిస్‌ను ఏఐ ద్వారా క్లోనింగ్ చేసి, వేరే ముఖానికి వాడుకుంటే మాత్రం ఈ అల్గారిథమ్ దానిని గుర్తించలేదు. కేవలం విజువల్స్ పరంగా జరిగే ఏఐ మార్పిడులను మాత్రమే ఇది కనిపెడుతుంది. తమ ప్రైవసీ గైడ్‌లైన్స్ ఉల్లంఘించే ఇలాంటి ఫేక్ కంటెంట్‌ను క్రియేటర్లు చూసిన వెంటనే ఒకే ఒక్క క్లిక్‌తో యూట్యూబ్‌కు రిపోర్ట్ చేసి, ప్లాట్‌ఫామ్ నుంచి తొలగించేలా చేయవచ్చని గూగుల్ స్పష్టం చేసింది.

వెబ్‌సైట్ల తాజా సమాచారం ప్రకారం..
టెక్నాలజీ వెబ్‌సైట్లలో హల్‌చల్ చేస్తున్న లీక్స్ ప్రకారం, రాబోయే రోజుల్లో యూట్యూబ్ ఈ టూల్‌ను మరింత అప్‌గ్రేడ్ చేయనుంది. కేవలం ముఖం మాత్రమే కాకుండా, ఏఐ వాయిస్ క్లోనింగ్‌ను కూడా పట్టుకునేలా కొత్త ఆడియో ఐడెంటిటీ టూల్‌ను కూడా డెవలప్ చేస్తున్నట్లు సమాచారం. ఈ సరికొత్త ఏఐ నిఘా వ్యవస్థతో యూట్యూబ్‌లో క్రియేటర్ల కంటెంట్‌కు మరియు వారి వ్యక్తిగత గౌరవానికి మరింత రక్షణ లభిస్తుందని టెక్ నిపుణులు భావిస్తున్నారు.