Bitcoin : క్రిప్టో మార్కెట్లో ఒక్కసారిగా పెరిగిన జోష్.. రెండు వారాల గరిష్టానికి చేరిన బిట్‌కాయిన్

Bitcoin : ప్రపంచవ్యాప్తంగా అత్యంత ఆదరణ ఉన్న వర్చువల్ కరెన్సీ (క్రిప్టో మార్కెట్) సోమవారం ట్రేడింగ్‌లో భారీ వృద్ధిని నమోదు చేసింది. గత కొన్ని వారాలుగా మిడిల్ ఈస్ట్‌లో సాగుతున్న యుద్ధ వాతావరణం కారణంగా ఇన్వెస్టర్లు తీవ్ర ఆందోళన చెందారు. అయితే, ఊహించని విధంగా అక్కడ శాంతి స్థాపనకు సంబంధించిన సానుకూల సంకేతాలు రావడంతో గ్లోబల్ క్రిప్టో మార్కెట్ ఒక్కసారిగా పుంజుకుంది. అమెరికా, ఇరాన్ దేశాలు తమ మధ్య ఉన్న విభేదాలను పక్కన పెట్టి, పరస్పర దాడులను నిలిపివేయడానికి అంగీకరించాయి. అంతర్జాతీయ సరఫరాకు కీలకమైన హోర్ముజ్ స్ట్రెయిట్ నాకా బందీని ఎత్తివేయడానికి ఇరు దేశాల మధ్య అంగీకారం కుదిరింది.

ఈ అంతర్జాతీయ శాంతి ఒప్పందంపై అమెరికా ప్రెసిడెంట్ డోనాల్డ్ ట్రంప్ అధికారికంగా స్పందిస్తూ.. ఇరాన్‌తో డీల్ విజయవంతంగా పూర్తయిందని, హోర్ముజ్ జలసంధి దిగ్బంధాన్ని పూర్తిగా ముగిస్తున్నామని ప్రకటించారు. ఈ కీలక ప్రకటన వెలువడిన వెంటనే అంతర్జాతీయ క్రిప్టో ఎక్స్ఛేంజ్ కాయిన్‌ మార్కెట్‌ క్యాప్లో బిట్‌కాయిన్ ధర రెండు వారాల గరిష్ట స్థాయి అయిన 65,625 డాలర్లకు (సుమారు రూ.55 లక్షలు) చేరుకుంది. ప్రపంచంలోనే రెండో అతిపెద్ద క్రిప్టో టోకెన్ అయిన  ఇథీరియం కూడా లాభాల్లో పయనిస్తూ 1,718 డాలర్ల వద్ద ట్రేడ్ అయింది. వీటితో పాటు సోలానా, బీఎన్‌బీ, Tron , XRP వంటి ఇతర పాపులర్ కరెన్సీలు కూడా మంచి లాభాలను ఆర్జించాయి. దీనివల్ల మొత్తం క్రిప్టో మార్కెట్ క్యాపిటలైజేషన్ 1.88 శాతం పెరిగి 2.24 లక్షల కోట్ల డాలర్లకు చేరింది.

Jio 1-Year Recharge Plans : జియో కస్టమర్లకు బంపర్ ఆఫర్.. ఒక్క రీఛార్జ్‌తో ఏడాది పాటు నో టెన్షన్

ఇటీవలి కాలంలో ఎక్స్ఛేంజ్ ట్రేడెడ్ ఫండ్స్ నుంచి ఇన్వెస్టర్లు పెద్ద ఎత్తున నిధులను వెనక్కి తీసుకోవడం, బిట్‌కాయిన్ అతిపెద్ద కాపొరేట్ హోల్డర్ స్ట్రాటజీ (మునుపటి పేరు మైక్రోస్ట్రాటజీ) కొన్ని టోకెన్లను విక్రయించడం వల్ల బిట్‌కాయిన్ ధర 60,000 డాలర్ల కంటే కిందకు పడిపోయింది. అయితే, ఆ తర్వాత ఈ అమెరికన్ సాఫ్ట్‌వేర్ సంస్థ మళ్లీ భారీగా బిట్‌కాయిన్లను కొనుగోలు చేసింది. ప్రస్తుతం ఈ కంపెనీ వద్ద ఏకంగా 8,45,256 బిట్‌కాయిన్లు ఉన్నాయి. ఈ హోల్డింగ్స్ మొత్తం విలువ దాదాపు 53.6 బిలియన్ డాలర్లు (సుమారు రూ.4.4 లక్షల కోట్లు) ఉంటుంది. కంపెనీ కో-ఫౌండర్ మైఖేల్ సేలర్ తెలిపిన వివరాల ప్రకారం.. వారు ప్రతి బిట్‌కాయిన్‌ను సగటున 75,680 డాలర్ల ధరతో కొనుగోలు చేయగా, ఇందుకోసం కంపెనీకి అయిన మొత్తం ఖర్చు దాదాపు 64 బిలియన్ డాలర్లు. గత ఏడాది అక్టోబర్‌లో బిట్‌కాయిన్ ఏకంగా 1,26,000 డాలర్ల ఆల్‌టైమ్ హై రికార్డును సృష్టించగా, ఆ తర్వాత నుండి ఇది దాదాపు 45 శాతం క్షీణించింది.

ప్రస్తుత మార్కెట్ పరిస్థితులపై క్రిప్టో విశ్లేషకులు స్పందిస్తూ.. బిట్‌కాయిన్‌కు ప్రస్తుతం 67,000 డాలర్ల వద్ద గట్టి రెసిస్టెన్స్ ఉందని చెప్తున్నారు. మిడిల్ ఈస్ట్‌లో ఉద్రిక్తతలు తగ్గడం మరియు వ్యాపార మార్గాలు ఓపెన్ అవ్వడం వల్ల రాబోయే రోజుల్లో మార్కెట్లలో మరింత వేగంగా వృద్ధి ఉండే అవకాశం ఉంది. ఇది ఇన్వెస్టర్లకు ధైర్యాన్ని ఇస్తుంది కాబట్టి క్రిప్టో లాంటి హై-రిస్క్ మార్కెట్లలో పెట్టుబడులు పెట్టడానికి ట్రేడర్లు మరింత ముందుకు వస్తారు. అయితే, ఇదే వారంలో అమెరికాలో జరగబోయే ఫెడరల్ రిజర్వ్ కీలక సమావేశం మార్కెట్లపై ప్రభావం చూపే అవకాశం ఉంది. ఒకవేళ ఈ మీటింగ్‌లో ద్రవ్యోల్బణాన్ని అదుపు చేయడానికి వడ్డీ రేట్లను  పెంచే కఠిన నిర్ణయాలు తీసుకుంటే మాత్రం.. క్రిప్టో మార్కెట్ మళ్లీ నష్టాల్లోకి జారుకునే ప్రమాదం ఉందని నిపుణులు హెచ్చరిస్తున్నారు.