WhatsApp : వాట్సాప్ యూజర్లకు గుడ్ న్యూస్.. స్కామర్ల ఆట కట్టించేందుకు వస్తున్న సరికొత్త ఫీచర్

WhatsApp : ప్రముఖ మెసేజింగ్ యాప్ వాట్సాప్ తన యూజర్ల భద్రత కోసం నిరంతరం సరికొత్త ఫీచర్లను పరిచయం చేస్తూనే ఉంటుంది. ఈ క్రమంలోనే ఆన్‌లైన్ మోసాలకు, స్కామ్‌లకు అడ్డుకట్ట వేసేందుకు ఆండ్రాయిడ్ యూజర్ల కోసం ఒక సరికొత్త ప్రైవసీ ఫీచర్‌ను డెవలప్ చేస్తోంది. గుర్తు తెలియని నంబర్ల నుంచి వచ్చే మెసేజ్‌ల వల్ల యూజర్లు మోసపోకుండా కాపాడడమే ఈ ఫీచర్ ముఖ్య ఉద్దేశం. మనం ఎవరితోనైనా చాటింగ్ ప్రారంభించడానికి ముందే, ఆ మెసేజ్‌లలో ఏవైనా అనుమానాస్పద విషయాలు ఉంటే వాట్సాప్ మనల్ని హెచ్చరిస్తుంది. దీనివల్ల అమాయక యూజర్లు సైబర్ నేరగాళ్ల ఉచ్చులో పడకుండా జాగ్రత్త పడవచ్చు.

వాట్సాప్ అప్‌డేట్లను ట్రాక్ చేసే ప్రముఖ వెబ్‌సైట్ వాబీటాఇన్ఫో ప్రకారం.. ఈ కొత్త ఫీచర్‌ను  స్కామ్ అలర్ట్ అని పిలుస్తున్నారు. గూగుల్ ప్లే స్టోర్‌లోని వాట్సాప్ బీటా ఆండ్రాయిడ్ యాప్ వెర్షన్ 2.26.22.2లో ఈ ఫీచర్‌ను మొదటగా గుర్తించారు. ప్రస్తుతం ఇది డెవలప్‌మెంట్ స్టేజ్‌లో ఉంది. టెస్టింగ్ అంతా పూర్తయిన తర్వాత రాబోయే రోజుల్లో సాధారణ ఆండ్రాయిడ్ యూజర్లందరికీ ఈ అప్‌డేట్‌ను అందుబాటులోకి తీసుకురానున్నారు.

ఈ స్కామ్ అలర్ట్ ఫీచర్ పనితీరు చాలా ప్రత్యేకంగా ఉండబోతోంది. సాధారణంగా అపరిచిత వ్యక్తుల నుంచి వచ్చే మెసేజ్ ఏదైనా అనుమానాస్పదంగా అనిపిస్తే, వాట్సాప్ ఆ చాట్‌ను ఆటోమేటిక్‌గా బ్లాక్ చేయదు. దానికి బదులుగా, ఆ చాట్ స్క్రీన్ పైభాగంలో ఇది ఒక స్కామ్ కావచ్చు అనే ఒక వార్నింగ్ బ్యానర్‌ను చూపిస్తుంది. దాంతో పాటు ఆ మెసేజ్ కి సంబంధించిన కొన్ని ముఖ్యమైన వివరాలను కూడా యూజర్లకు అందిస్తుంది. దీనివల్ల అవతలి వ్యక్తి నమ్మకమైనవాడా కాదా అనేది యూజర్లు స్వయంగా నిర్ణయించుకోవచ్చు. ఆ తర్వాత సదరు నంబర్‌ను బ్లాక్ అండ్ రిపోర్ట్ చేయాలా లేక చాటింగ్ కొనసాగించాలా అనేది యూజర్ ఇష్టానికే వదిలేస్తారు.

ఈ ఫీచర్‌లో అత్యంత అద్భుతమైన విషయం ఏమిటంటే దీని ప్రైవసీ కంట్రోల్. ఈ స్కామ్ డిటెక్షన్ ప్రాసెస్ అంతా పూర్తిగా యూజర్  మొబైల్ లోనే జరుగుతుంది. ప్రస్తుతం వాట్సాప్‌లో ఉన్న వాయిస్ ట్రాన్స్‌క్రిప్ట్ (వాయిస్ మెసేజ్‌ను టెక్స్ట్‌గా మార్చడం) ఫీచర్ లాగే ఇది కూడా పనిచేస్తుంది. అంటే మీ చాట్స్ లేదా మెసేజ్‌లు స్కాన్ అవ్వడం కోసం ఎలాంటి బాహ్య సర్వర్లకు వెళ్లవు. మీ ఫోన్ లోనే లోకల్‌గా ఈ అనాలిసిస్ జరుగుతుంది. కాబట్టి మీ పర్సనల్ మెసేజ్‌లను వాట్సాప్ కంపెనీ కానీ లేదా ఇతర థర్డ్ పార్టీ సంస్థలు కానీ చూసే అవకాశం అస్సలు ఉండదు.

iPhone 18 Pro : ఐఫోన్ లవర్స్‌కు బిగ్ షాక్.. ఐఫోన్ 18 ప్రో మోడళ్లలో బ్యాటరీ సైజ్ మారబోతోందా?

అంతేకాకుండా, ఈ స్కామ్ అలర్ట్ ఫీచర్ బ్యాక్‌గ్రౌండ్‌లో చాలా సైలెంట్‌గా పనిచేస్తుంది. దీనివల్ల అవతలి వ్యక్తికి మీ ఫోన్ లో ఈ ఫీచర్ ఆన్ లో ఉందా లేదా అనే విషయం అస్సలు తెలియదు. దీనితో పాటు వాట్సాప్ మరో పారదర్శకమైన  విధానాన్ని కూడా తీసుకొస్తోంది. మీ ఫోన్‌లో ఈ ఫీచర్ ఎప్పుడెప్పుడు ట్రిగ్గర్ అయింది, ఏయే మెసేజ్‌లను అనుమానాస్పదంగా గుర్తించింది అనే వివరాలను ఒక లోకల్ లాగ్ రూపంలో యూజర్లు చెక్ చేసుకోవచ్చు. ఈ రికార్డులు కూడా ఫోన్ లోనే భద్రంగా ఉంటాయి. వాట్సాప్‌తో షేర్ చేయబడవు. ఒకవేళ ఎలాంటి స్కామ్స్ జరగకపోతే, రిపోర్ట్ ఖాళీగా చూపిస్తుంది.

చివరగా, ఈ  స్కామ్ అలర్ట్ అనేది ఒక ఆప్షనల్ ఫీచర్ మాత్రమే. యాప్ ఇన్‌స్టాల్ చేసుకున్నప్పుడు ఇది బై-డిఫాల్ట్‌గా డిసేబుల్ (ఆఫ్) అయి ఉంటుంది. ఈ ఫీచర్ కావాలనుకునే యూజర్లు వాట్సాప్ సెట్టింగ్స్ మెనూలోకి వెళ్లి మాన్యువల్‌గా దీనిని ఎనేబుల్ (ఆన్) చేసుకోవాల్సి ఉంటుంది. వాట్సాప్ సాంప్రదాయక ఎండ్-టు-ఎండ్ ఎన్‌క్రిప్షన్ భద్రతకు ఎలాంటి భంగం కలగకుండా ఈ ఫీచర్‌ను డిజైన్ చేస్తున్నారు. ప్రస్తుతం ఇది అభివృద్ధి దశలోనే ఉన్నందున, ఇది అందరికీ ఎప్పటి నుండి అందుబాటులోకి వస్తుందనే అధికారిక డేట్‌ను కంపెనీ ఇంకా ప్రకటించలేదు.