Airtel Unlimited 5G Hotspot Update: ఎయిర్‌టెల్ అన్‌లిమిటెడ్ 5G హాట్‌స్పాట్‌ వివాదంపై క్లారిటీ.. కస్టమర్లకు ఊరటనిచ్చే అప్‌డేట్

Airtel Unlimited 5G Hotspot Update: గత కొద్ది రోజులుగా ప్రముఖ టెలికాం సంస్థ ఎయిర్‌టెల్ అన్‌లిమిటెడ్ 5G డేటా ప్లాన్లకు సంబంధించి సోషల్ మీడియాలో పెద్ద ఎత్తున రగడ నడిచింది. ఎయిర్‌టెల్ తన అన్‌లిమిటెడ్ 5G ప్లాన్లలో మొబైల్ హాట్‌స్పాట్ ద్వారా డేటాను వేరే డివైజ్‌లు లేదా ఫ్రెండ్స్‌తో షేర్ చేయడానికి అనుమతించడం లేదని, కస్టమర్లను మోసం చేస్తోందని ఎక్స్ వేదికగా అనేకమంది యూజర్లు, ప్రముఖ టిప్పర్లు తీవ్ర స్థాయిలో ధ్వజమెత్తారు. అయితే తాజాగా ఎయిర్‌టెల్ తన అధికారిక వెబ్‌సైట్‌లోని నియమ నిబంధనల పేజీ నుంచి ఈ వివాదాస్పద ఆంక్షల క్లాజ్‌ను అప్‌డేట్ చేయడంతో ఈ సస్పెన్స్‌కు తెరపడింది.

ఈ వివాదానికి ప్రధాన కారణం ఎయిర్‌టెల్ వెబ్‌సైట్‌కు చెందిన కొన్ని పాత స్క్రీన్‌షాట్లు సోషల్ మీడియాలో విపరీతంగా షేర్ అవ్వడమే. అందులో "అన్‌లిమిటెడ్ 5G డేటాని మొబైల్ హాట్‌స్పాట్ ద్వారా ఇతర డివైజ్‌లకు షేర్ చేయడానికి అనుమతి లేదు" అని రాసి ఉంది. దీనివల్ల వర్క్ ఫ్రమ్ హోమ్ చేసేవారు, ల్యాప్‌టాప్‌లు లేదా స్మార్ట్ టీవీలకు హాట్‌స్పాట్ కనెక్ట్ చేసుకునే యూజర్లు తీవ్ర ఆగ్రహం వ్యక్తం చేశారు. తాము రీఛార్జ్ చేసుకున్న డేటాను తమ ఇష్టమొచ్చినట్లు వాడుకునే స్వేచ్ఛ లేకపోతే ప్లాన్ ఎందుకంటూ ఎయిర్‌టెల్‌పై కామెంట్ల వర్షం కురిపించారు.

అయితే, తాజాగా ఎయిర్‌టెల్ సంస్థ తన అధికారిక వెబ్‌సైట్‌లోని టర్మ్స్ అండ్ కండిషన్స్ పేజీ నుంచి హాట్‌స్పాట్ వాడకూడదనే నిబంధనను తొలగించింది. సాంకేతికంగా కూడా ఎయిర్‌టెల్ ఎప్పుడూ హాట్‌స్పాట్ సేవలను బ్లాక్ చేయలేదని, కేవలం నిబంధనల్లో ఉన్న అస్పష్టత వల్లే యూజర్లలో ఈ గందరగోళం నెలకొందని నెట్‌వర్క్ రంగానికి చెందిన నిపుణులు వెల్లడించారు. ఇప్పుడు ఆ క్లాజ్‌ను తీసివేయడంతో యూజర్లు ఎటువంటి ఆటంకం లేకుండా తమ మొబైల్ హాట్‌స్పాట్ ద్వారా ల్యాప్‌టాప్‌లు, టాబ్లెట్లలో 5G డేటాను నిరభ్యంతరంగా వాడుకోవచ్చు.

Redmi Note 17 Launching on August 6th 2026: స్మార్ట్‌ఫోన్ మార్కెట్లో రెడ్‌మి సరికొత్త సంచలనం.. భారత్‌లో ఆగస్టు 6న రెడ్‌మి నోట్ 17 లాంచ్!

ఇక అన్‌లిమిటెడ్ 5G ప్లాన్లకు సంబంధించి మరొక ముఖ్యమైన విషయం ఏంటంటే.. ఎయిర్‌టెల్ ప్రతీ ప్లాన్‌పై నెలకు (30 రోజుల సైకిల్‌కు) 300GB వరకు డేటా పరిమితిని అమలు చేస్తోంది. ఈ నిబంధన మొదటి నుంచి అమల్లోనే ఉంది. పర్సనల్ లేదా నాన్-కమర్షియల్ వినియోగానికి 300GB డేటా ధారాళంగా సరిపోతుంది. కేవలం బిజినెస్ అవసరాలకు లేదా వాణిజ్యపరమైన దుర్వినియోగానికి చెక్ పెట్టడానికే కంపెనీ ఈ 300GB లిమిట్‌ను ఉంచినట్లు స్పష్టం చేసింది.

పోటీ సంస్థలైన జియో, వీఐ తమ అన్‌లిమిటెడ్ 5G ఆఫర్లలో హాట్‌స్పాట్ డేటా షేరింగ్‌పై ఎలాంటి కఠిన ఆంక్షలు పెట్టకపోవడంతో, చాలామంది యూజర్లు ఎయిర్‌టెల్ నెట్‌వర్క్ నుంచి పోర్ట్ అవుతామని బెదిరించారు. అయితే ఎయిర్‌టెల్ తన వెబ్‌సైట్ ద్వారా స్పష్టత ఇవ్వడంతో ప్రస్తుతం యూజర్లు ఊపిరి పీల్చుకుంటున్నారు. ఎయిర్‌టెల్ 5G సిమ్ ఉన్న యూజర్లు తమ స్మార్ట్‌ఫోన్లలో అన్‌లిమిటెడ్ 5G ఆఫర్‌ను క్లెయిమ్ చేసుకుని, హాట్‌స్పాట్ ద్వారా ఇతర పరికరాలకు షేర్ చేసుకుని హై-స్పీడ్ ఇంటర్నెట్‌ను ఆస్వాదించవచ్చని స్పష్టమైంది.