Jio : జియో యూజర్లకు బంపర్ ఆఫర్.. ఇకపై ఫోన్ మాట్లాడుతూనే ఫుడ్ ఆర్డర్, క్యాబ్ బుక్ చేసుకోవచ్చు

Jio : రిలయన్స్ జియో తమ 50 కోట్లకు పైగా ఉన్న కస్టమర్ల కోసం ఒక అదిరిపోయే సువార్తను అందించింది. 49వ రిలయన్స్ వార్షిక సాధారణ సభలో జియో చైర్మన్ ఆకాష్ అంబానీ సరికొత్త  జియో ఏఐ కాల్ ఏజెంట్‎ను పరిచయం చేశారు. ఇది టెలికాం రంగంలోనే ఒక సరికొత్త విప్లవానికి నాంది పలకబోతోంది. ఈ ఏఐ ఆధారిత హెల్పర్ ద్వారా మొబైల్ వినియోగదారులు ఫోన్ కాల్స్ మాట్లాడే విధానం పూర్తిగా మారిపోనుంది. మనం ఫోన్ కాల్ లో ఉంటూనే కేవలం ఒక్క వాయిస్ కమాండ్‌తో ఎన్నో రకాల పనులను సులభంగా పూర్తి చేసుకోవచ్చు.

హే జియో అంటే చాలు.. పనైపోతుంది
ఈ జియో ఏఐ కాల్ ఏజెంట్ ఎలా పనిచేస్తుందంటే.. మీరు ఎవరితోనైనా ఫోన్ లో మాట్లాడుతున్న సమయంలో హఠాత్తుగా మీకు ఫుడ్ ఆర్డర్ చేయాలన్నా లేదా ఆఫీస్ కి వెళ్లడానికి క్యాబ్ బుక్ చేయాలన్నా.. వేరే యాప్స్ ఓపెన్ చేయాల్సిన అవసరం లేదు. కాల్ లోనే ఉంటూ  హే జియో అని చెప్తే చాలు, ఈ ఏఐ అసిస్టెంట్ వెంటనే యాక్టివ్ అవుతుంది. ఆ తర్వాత మీరు ఇచ్చే ఆర్డర్లను అది నిమిషాల్లో నెరవేరుస్తుంది. అంతేకాకుండా, మీరు మాట్లాడిన కాల్ మొత్తాన్ని రికార్డ్ చేసి, దాన్ని టెక్స్ట్ రూపంలోకి మార్చడం, కాల్ సారాంశాన్ని కూడా తయారు చేసి ఇవ్వగలదు.

నెట్‌వర్క్‌లోనే ఇన్బిల్ట్.. పూర్తిగా ఉచితం
ఈ అద్భుతమైన ఫీచర్‌ను ఉపయోగించుకోవడానికి వినియోగదారులు తమ మొబైల్‌లో ఎలాంటి థర్డ్ పార్టీ అప్లికేషన్లను ఇన్‌స్టాల్ చేసుకోవాల్సిన అవసరం లేదు. ఈ ఏఐ ఏజెంట్‌ను జియో సంస్థ నేరుగా తన టెలికాం నెట్‌వర్క్‌లోనే ఇంటిగ్రేట్ చేస్తోంది. యూజర్ల అనుమతితోనే ఇది లైవ్ కాల్స్ లో రియల్ టైమ్‌లో పనిచేస్తుంది. మీటింగ్స్ షెడ్యూల్ చేయడం వంటి పనులను కూడా ఇది చూసుకుంటుంది. అన్నింటికంటే ముఖ్యమైన విషయం ఏంటంటే, ఈ సేవలను జియో యూజర్లందరికీ పూర్తిగా ఉచితంగా అందించనున్నారు. దీని కోసం ఎలాంటి అదనపు ఛార్జీలు చెల్లించాల్సిన అవసరం లేదు.

Raleigh One : మార్కెట్లోకి సరికొత్త రేలీ వన్ ఎలక్ట్రిక్ బైక్.. ఒక్క ఛార్జ్‌తో 80 కిలోమీటర్ల రేంజ్

తెలుగుతో పాటు అన్ని భారతీయ భాషలకు సపోర్ట్
ఈ జియో ఏఐ కాల్ ఏజెంట్‌ను ఈ ఏడాది చివరి నాటికి వినియోగదారులకు అందుబాటులోకి తీసుకురావాలని కంపెనీ ప్లాన్ చేస్తోంది. ఈ ఏఐ టూల్‌ను పూర్తిగా మేడ్ ఇన్ ఇండియా టెక్నాలజీతో రూపొందించారు. ఇది తెలుగుతో పాటు దేశంలోని అన్ని ప్రధాన ప్రాంతీయ భాషలను సపోర్ట్ చేస్తుంది. దీనివల్ల నగరాల్లో ఉండే వారికే కాకుండా గ్రామాల్లోని సామాన్య ప్రజలకు కూడా ఇది ఎంతగానో ఉపయోగపడనుంది. ఈ ఏఐ ఏజెంట్‌లో ఉన్న మరో సూపర్ ఫీచర్ ఏంటంటే.. ఒకే గ్రూప్ కాల్ లో ఉన్న 10 మంది విభిన్న వ్యక్తుల వాయిస్‌లను ఇది పర్ఫెక్ట్‌గా గుర్తించగలదు. ఎవరు ఏ విషయం మాట్లాడారో కూడా స్పష్టమైన రికార్డ్ ఉంచగలదు.