Solar Storm Alert : సూర్యుడిపై వరుస పేలుళ్లు.. భూమి వైపు దూసుకొస్తున్న సౌర తుఫాను

Solar Storm Alert : మనకు నిరంతరం వెలుగునిచ్చే సూర్యుడు ఒక్కసారిగా ఉగ్రరూపం దాల్చాడు. సూర్యుడి ఉపరితలంపై ఉన్న ఒక అత్యంత చురుకైన సన్‌స్పాట్ ప్రాంతం నుంచి ఒకే రోజులో మూడు అత్యంత శక్తివంతమైన సౌర జ్వాలలు ఎగిసిపడ్డాయి. AR 4455 అని పిలిచే ఈ సన్‌స్పాట్ ప్రాంతంలో జరిగిన అలజడి కారణంగా అంతరిక్షంలోకి భారీ ఎత్తున చార్జ్డ్ పార్టికల్స్, ప్లాస్మా మేఘాలు విడుదలయ్యాయి. వీటినే సైన్స్ భాషలో కరోనల్ మాస్ ఎజెక్షన్స్ అని పిలుస్తారు. ఇవి ఇప్పుడు నేరుగా భూమి వైపు దూసుకొస్తున్నాయి.

జీ3 స్థాయి జియోమాగ్నెటిక్ స్టార్మ్ అలర్ట్
ఈ అసాధారణ అంతరిక్ష పరిణామాల నేపథ్యంలో.. అమెరికాకు చెందిన  నోవా స్పేస్ వెదర్ ప్రిడిక్షన్ సెంటర్ భూమిపై తీవ్రమైన  G3 స్థాయి జియోమాగ్నెటిక్ స్టార్మ్ (భూ అయస్కాంత తుఫాను) హెచ్చరికలను జారీ చేసింది. సూర్యుడి నుంచి వెలువడిన ఈ కణాలు భూమిని తాకినప్పుడు మన గ్రహం అయస్కాంత క్షేత్రాన్ని తీవ్రంగా ప్రభావితం చేస్తాయి. అయితే, ఈ తుఫాను కారణంగా ఆకాశంలో ఒక అద్భుతమైన దృశ్యం ఆవిష్కృతం కాబోతోంది. సాధారణంగా ధ్రువ ప్రాంతాలకే పరిమితమయ్యే రంగురంగుల అరోరా కాంతులు, ఈసారి చాలా తక్కువ అక్షాంశాల వద్ద కూడా కనిపించే అవకాశం ఉండటంతో స్కై వాచర్స్, ఖగోళ ప్రియులు ఎంతగానో ఉత్సాహపడుతున్నారు.

ఒకే ప్రాంతం నుంచి ట్రిపుల్ స్ట్రైక్
ప్రముఖ అంతరిక్ష వెబ్‌సైట్ స్పేస్.కామ్ అందించిన వివరాల ప్రకారం.. సూర్యుడి ఉత్తర మధ్య భాగంలో ఉన్న సంక్లిష్టమైన సన్‌స్పాట్ క్లస్టర్ AR 4455 జూన్ 3వ తేదీన మూడు భారీ జ్వాలలను విడుదల చేసింది. ఇందులో మొదటిది M9.3, రెండవది M7.7, మూడవది అత్యంత ప్రమాదకరమైన X1.0 కేటగిరీకి చెందినది. సౌర జ్వాలల వర్గీకరణలో X క్లాస్ అనేది అన్నింటికంటే టాప్ టైర్. సూర్యుడి అయస్కాంత క్షేత్రాలు ఒకదానితో ఒకటి ముడిపడి, ఒక్కసారిగా తెగిపోయి మళ్లీ కలిసినప్పుడు ఇటువంటి భారీ రేడియేషన్ విస్ఫోటనాలు సంభవిస్తాయి.

Google : గూగుల్ జెమినిలో అదిరిపోయే ఫీచర్.. ఇక మీలాగే మాట్లాడే ఏఐ అవతార్ వచ్చేస్తోంది

భూమిపై రేడియో కమ్యూనికేషన్లకు అంతరాయం
సూర్యుడిపై జరిగిన ఈ మూడు భారీ పేలుళ్ల ప్రభావం భూమిపై వెంటనే కనిపించింది. ఈ జ్వాలల నుంచి వెలువడిన తీవ్రమైన రేడియేషన్ కారణంగా భూమిపై పగటి భాగం ఉన్న ప్రాంతాలలో రేడియో సిగ్నళ్లకు తాత్కాలికంగా బ్రేక్ పడింది. ముఖ్యంగా X1.0 జ్వాల అత్యంత శక్తివంతమైనది కావడంతో, దీనివల్ల బలమైన R3 స్థాయి రేడియో బ్లాకౌట్స్ ఏర్పడ్డాయి. అదేవిధంగా, మిగిలిన రెండు ఎమ్-క్లాస్ జ్వాలల కారణంగా మోస్తరు స్థాయి R2 రేడియో అంతరాయాలు ఏర్పడి కమ్యూనికేషన్ వ్యవస్థలను కాసేపు తిప్పలు పెట్టాయి.

ఆకాశంలో అద్భుతమైన అరోరా కాంతుల ప్రదర్శన
సూర్యుడి నుంచి విడుదలైన ఈ మూడు విస్ఫోటనాలలో కనీసం రెండు ప్లాస్మా మేఘాలు గంటకు వందల కిలోమీటర్ల వేగంతో ప్రయాణిస్తూ భూమి వైపు వస్తున్నాయి. ఇవి సాధారణంగా ఒకటి నుంచి మూడు రోజులలోపు భూమిని చేరుకుంటాయి. ఇవి భూ వాతావరణాన్ని తాకినప్పుడు సృష్టించే జియోమాగ్నెటిక్ తుఫానుల వల్ల ఆకాశంలో అద్భుతమైన వెలుగులు విరజిమ్ముతాయి. ప్రస్తుత G3 పరిస్థితుల ఆధారంగా.. ఈ అరోరా కాంతులు ఉత్తర అమెరికా, కెనడా,  ఉత్తర ఐరోపాలోని కొన్ని ప్రాంతాలలో సాధారణం కంటే చాలా తక్కువ ఎత్తులోనే స్పష్టంగా కనిపించనున్నాయి.