Xiaomi : మార్కెట్లోకి వచ్చేసిన షావోమి స్మార్ట్ బ్యాండ్ 10 ప్రో.. ఫీచర్లు చూస్తే ఫిదా అయిపోతారు

Xiaomi  : ప్రముఖ చైనీస్ టెక్ దిగ్గజం షావోమి తన మోస్ట్ పాపులర్ వేరబుల్ సిరీస్‌లో సరికొత్త మోడల్‌ను మార్కెట్లోకి తీసుకొచ్చింది. చైనాలో గురువారం జరిగిన ఒక భారీ ఈవెంట్‌లో షావోమి 17 మ్యాక్స్ స్మార్ట్‌ఫోన్, షావోమి ఇయర్ క్లిప్ ఇయర్‌ఫోన్స్‌తో పాటు షావోమి స్మార్ట్ బ్యాండ్ 10 ప్రోను అఫీషియల్‌గా లాంచ్ చేసింది. ఈ కొత్త వేరబుల్ కస్టమర్లను ఆకట్టుకునేలా సరికొత్త డిజైన్, అదిరిపోయే డిస్‌ప్లేతో వచ్చింది. గత వెర్షన్ల కంటే ఎంతో అప్‌గ్రేడ్ అయిన ఈ స్మార్ట్‌వాచ్, ఒక్కసారి ఫుల్ చార్జ్ చేస్తే ఏకంగా 21 రోజుల పాటు నిరంతరాయంగా పనిచేస్తుందని కంపెనీ గర్వంగా చెప్తోంది. ఈ వాచ్ ఫిట్‌నెస్ ఫ్రీక్స్‌కు ఒక పర్ఫెక్ట్ పార్ట్‌నర్‌లా ఉపయోగపడనుంది.

ఈ సరికొత్త షావోమి స్మార్ట్ బ్యాండ్ 10 ప్రో మొత్తం మూడు వేరియంట్లలో అందుబాటులోకి వచ్చింది. దీని బేస్ లేదా స్టాండర్డ్ వెర్షన్ ధరను 399 చైనీస్ యువాన్లు (మన కరెన్సీలో సుమారు రూ.5,600) గా నిర్ణయించారు. అలాగే స్టైలిష్ లుక్ కోసం లెదర్ స్ట్రాప్‌తో వచ్చే వేరియంట్ ధర 449 యువాన్లు (సుమారు రూ.6,500)గా ఉంది. వీటితో పాటు ఈసారి కంపెనీ ఎంతో లగ్జరీగా కనిపించే ఒక ప్రీమియం సెరామిక్ వెర్షన్‌ను కూడా తీసుకొచ్చింది. దీని ధర 479 యువాన్లు (సుమారు రూ.6,700). ఈ సెరామిక్ వెర్షన్‌లో గట్టి అల్యూమినియం అల్లాయ్ ఫ్రేమ్‌తో పాటు చేతికి ఎంతో కంఫర్ట్‌గా ఉండే ఫ్లోరోరబ్బర్ స్ట్రాప్‌ను ఇచ్చారు. ఇది బ్లాక్, చెర్రీ బ్లోసమ్ పింక్, కోరల్ ఆరెంజ్, చీజ్ వైట్, సెరామిక్ వైట్, సిల్వర్ వంటి సూపర్ కలర్ ఆప్షన్లలో లభిస్తోంది.

షావోమి స్మార్ట్ బ్యాండ్ 10 ప్రో టెక్నికల్ ఫీచర్ల విషయానికి వస్తే.. ఇందులో స్కేర్ ఆకారంలో ఉండే 1.74 ఇంచుల అమోలెడ్ కలర్ డిస్‌ప్లేను అమర్చారు. ఇది 336×480 పిక్సెల్స్ రెజల్యూషన్‌ను కలిగి ఉంది. అన్నింటికంటే ముఖ్యమైన విషయం ఏంటంటే, ఈ స్క్రీన్ ఏకంగా 2000 నిట్స్ పీక్ బ్రైట్‌నెస్‌ను సపోర్ట్ చేస్తుంది. దీనివల్ల మండుటెండలో బయట తిరుగుతున్నా సరే, స్క్రీన్ పై ఉండే అక్షరాలు చాలా క్లియర్‌గా కనిపిస్తాయి. స్క్రీన్‌కు రక్షణగా 2.5D టెంపర్డ్ గ్లాస్ కోటింగ్‌ను ఇచ్చారు. సాఫ్ట్‌వేర్ పరంగా ఈ స్మార్ట్‌వాచ్ షావోమి సరికొత్త హైపర్‌ఓఎస్ 3 ఇంటర్‌ఫేస్‌పై రన్ అవుతుంది. దీనివల్ల వాచ్ ఆపరేట్ చేయడం చాలా స్మూత్‌గా, వేగంగా ఉంటుంది. కస్టమర్లు తమ మూడ్‌కు తగ్గట్టు మార్చుకోవడానికి ఇందులో 200 కంటే ఎక్కువ వాచ్ ఫేస్‌లు ఉన్నాయి.

Photo Credit: Xiaomi Smart Band 10 Pro

ఆరోగ్యం, ఫిట్‌నెస్ విషయాల్లో ఈ వాచ్ అస్సలు రాజీ పడదు. ఇందులో సరికొత్త డ్యూయల్ లైట్ పీపీడీ సెన్సార్‎ను వాడారు. ఇది మన గుండె కొట్టుకునే వేగాన్ని   ఏకంగా 98.2 శాతం ఖచ్చితత్వంతో ట్రాక్ చేస్తుందని కంపెనీ పేర్కొంది. దీనితో పాటు రక్తంలో ఆక్సిజన్ శాతాన్ని కొలిచే SpO2 మానిటరింగ్, గుండె వేగంలో వచ్చే మార్పులను గమనించే హెచ్‌ఆర్‌వీ (HRV) మానిటరింగ్, రాత్రి పూట మనం ఎంత పద్ధతిగా నిద్రపోతున్నామో చెప్పే స్లీప్ ట్రాకింగ్ ఫీచర్లు ఇందులో ఉన్నాయి. అంతేకాకుండా రోజువారీ ఒత్తిడిని కొలవడానికి, మన కదలికలను ట్రాక్ చేయడానికి ఇందులో యాక్సిలరోమీటర్, అంబియంట్ లైట్ సెన్సార్, గైరోస్కోప్, జియోమ్యాగ్నెటిక్ సెన్సార్లను అమర్చారు.

క్రీడాకారులు, వ్యాయామం చేసే వారి కోసం ఇందులో 150 కంటే ఎక్కువ స్పోర్ట్స్ మోడ్స్ ఉన్నాయి. అంతేకాదు, గేమర్స్ కోసం ప్రత్యేకంగా ఒక సరికొత్త గేమ్ మోడ్‎ను ప్రవేశపెట్టారు, ఇది ఏకంగా 400 కంటే ఎక్కువ గేమ్స్ ఆడుతున్నప్పుడు మన బాడీ స్టేటస్‌ను ట్రాక్ చేస్తుంది. ఈ వాచ్‌ను కేవలం ఆండ్రాయిడ్ ఫోన్లకే కాకుండా యాపిల్ ఐఓఎస్ (iOS) ఎకోసిస్టమ్‌కు కూడా కనెక్ట్ చేసుకోవచ్చు. ఐఫోన్ యూజర్లు యాపిల్ షార్ట్‌కట్స్ యాప్ ద్వారా ఈ వాచ్‌లోని కొన్ని ముఖ్యమైన ఫంక్షన్లను ఆపరేట్ చేయవచ్చు. కనెక్టివిటీ కోసం ఇందులో బ్లూటూత్ 5.4, ఎన్‌ఎఫ్‌సీ (NFC), ఖచ్చితమైన లొకేషన్ ట్రాకింగ్ కోసం జీపీఎస్ (GPS), గ్లోనాస్, గెలీలియో, బైదూ వంటి మల్టిపుల్ శాటిలైట్ సిస్టమ్స్ ఉన్నాయి. ఇది 5ATM వాటర్ రెసిస్టెన్స్ రేటింగ్‌తో వస్తుంది, కాబట్టి ఈ వాచ్ పెట్టుకుని స్విమ్మింగ్ కూడా చేయవచ్చు.

ఈ వాచ్‌లో 350mAh లిథియం-అయాన్ పాలిమర్ బ్యాటరీని ఉపయోగించారు. ఒకసారి సున్నా నుంచి వంద శాతం పూర్తిగా చార్జ్ అవ్వడానికి ఇది కేవలం 90 నిమిషాల సమయం మాత్రమే తీసుకుంటుంది. ఒక్కసారి ఫుల్ చార్జ్ చేస్తే నార్మల్ యూసేజ్‌లో ఏకంగా 21 రోజుల పాటు బ్యాటరీ బ్యాకప్ ఇస్తుంది. ఇక బరువు విషయానికి వస్తే, అల్యూమినియం మెటల్ వెర్షన్ కేవలం 21.6 గ్రాములు, సెరామిక్ వెర్షన్ 28.7 గ్రాముల బరువు ఉంటాయి. చేతికి పెట్టుకుంటే అసలు వాచ్ ఉన్నట్లే తెలియనంత లైట్ వెయిట్‌తో దీనిని డిజైన్ చేశారు. ఆండ్రాయిడ్ 8.0 లేదా ఐఓఎస్ 14.0 అంతకంటే లేటెస్ట్ వెర్షన్ ఉన్న ఫోన్లలో షావోమి హెల్త్ యాప్ డౌన్‌లోడ్ చేసుకుని ఈ స్మార్ట్ బ్యాండ్‌ను వాడుకోవచ్చు.